ආයු‍බෝවන්!!!

කිරියෙන් පැණියෙන් ඉතිරෙන දිනයක් ‍‍වේවා!! ආරම්භය:2012/01/08

Saturday, December 27, 2014

ඡන්දෙ දැම්මෙ නැද්ද?

2015 ජනාධිපතිවරණය පාදක කරගනිමින් අපි ආරම්භ කල මත විමසුම අවසන් දින කීපයට පැමින තිබේ. කිසිදු ආකාරයක පක්ෂග්‍රාහීබවක් නොමැතිව 100%ක් ඔබේ නිදහස් මතයම ප්‍රදර්ශනය වන මෙි සඳහා දායක නොවු ඔබේ ‍ගෞරවනීය ප්‍රතිචාරය අපි තවදුරටත් බලාපොරොත්තුවන්නෙමු.

එන්න ජනවාරි 08 වන දාට පෙර සැබෑ ජනමතය කුමක් ද යන්න තක්සේරු කරගන්න ඔබත් දායක වන්න...

www.kiripeni.blogspot.com

Saturday, December 6, 2014

මීලඟ ජනපති කවුද?

2015 ජනවාරි මස 08 වන දින පැවැත්වීමට නියමිත ජනාධිපතිවරණයට පූර්වගාමීව පැවැත්වෙන විද්‍යුත් මත විමසුම.

"කිරිපැණි" අපි මතවාදී ලෙස කුමන පාර්ශවයක සිටියත් සෑම විටම ඔබේ නිදහස් මතයට ඉඩදුන් බව ඔබ දන්නවා.ඒ අනුව යමින් එළැබෙන ජනපතිවරණයේදී ජය කාට හිමිවේදැයි මත විමසුමකින් සොයාබලන්න අපි හිතුවා.

මුලින්ම ප්‍රධාන අපේක්ෂකයින් දෙපල පිලිබඳ පුංචි ප්‍රත්‍යාවලෝකනයක් කරන්න අපි කල්පනා කලේ ‍ඔබේ මනසේ යටගියාව මඳක් ඔපමට්ටම් කරන්න ඕන නිසයි.

අතිගරු ජනාධිපති මහින්ද රාජපක්ෂ මැතිතුමා කල මෙහෙවර කොහොම අමතක කරන්න ද? මේ ඒ පිලිබඳ අබින්දක්!
  • 30 අවුරුදු ශාපලත් යුද්ධය නිමාකරන්නට නොසැලෙන රාජ්‍ය නායක්ත්වය ලබාදීම.
  • සිඝ්‍ර සංවර්ධන වැඩපිලිවෙල ඔස්සේ අධිවෙිගී මාර්ග,නව වරාය හා ගුවන්තොටුපොල,දුම්රිය මාර්ග වැනි ඉදිකිරීම් සඳහා කැපවීම.
  • මහින්දෝදය විද්‍යාගාර,පරිගණක විද්‍යාගාර ඇති කිරීම.
  • නවීන තාක්ෂණය ව්‍යාප්ත කිරීම.
දැන් අපි මෛත්‍රීපාල සිරිසේන හිටපු ගරු ඇමති තුමා ගැන අවධානය යොමු කරමු.
  • යුධ ජයග්‍රහණය සඳහා ජනපති වෙහෙසෙද්දී එතුමාට සවියක් වෙමින් එම රජයේ රැඳීසිටීම
  • තම අමාත්‍ය සමයේ දී ඔෟෂධ පනත පර්ලිමේන්තුවට ගෙන ඒමට උත්සාහ දැරීම.
  • දුම්වැටි පැකට් සදහා 80% ක රූපමය අවවාද යෙදීමට උත්සාහ දැරීම.
  • රජරට සංවර්ධන වැඩ සඳහා රාජ්‍ය අවදානය යොමුකරවීම.
ප්‍රත්‍යාවලොකනය අසමබර බව පේන්න පුළුවන්.ඒ විධායක ජනපතිවරයෙක් හා ඔහු යටතේ සිටි ඇමතිවරයෙක් සැසඳීමට සිදුවූ නිසා බව ඔබට ඒ සමඟම වැටහෙන්න ඇති.

ඒ කුමක් වුවත් වත්මන් ප්‍රවනතා සහ අනාගත ප්‍රතිපත්ති පිලිබඳ අවබෝධයක් ඇති ඔබ ඔබේ නිදහස් මතය දක්වනු ඇතැයි අපි බලාපොරොත්තු වන්නෙමු!

Saturday, November 22, 2014

අනේ අපේ කලාකරුවෝ




කලාව යනු මිනිසා නම් වු ජීවියාගේ මනසතුල පමණක් උපදින මනස්කාන්ත මනෝභාවයක් ලෙස සරළව හැඳින්විය හැකිය.එය මිනිසාට දැනෙන දෙයකි. ඒ දැනිම,සංවේදනය සන්නිවේදනයකරන්නා කලාකරුවා ලෙස අපි හඳුන්වමු. ඒ මිනිසා අනික් මිනිසුන් අතර උත්තුංග පෞර්ෂයකි.

කවදත් අපේ කලාව,කලාකරුවා ගැන වන්දනීය මනසකින් කථාකල අපි අද අපේ කලාකරුවන්ගැන කතාකරන්න යන්නේ අතිමහත් කලකිරීමකිනි.

දේශපාලනය...

වෙන රටක නම් තවත් උත්තම ප්‍රස්තුතයකි. නමුත් අපේ රටේ ඒ තරම් ගඳගහන මාතෘකාවක් තවත් තිබේ ද? 

කලාවත් දේශපාලනයත් අතර අතීතයේ සිටම සබඳතා තිබුනු බව අපි දනිමු. ඒත් වත්මන තරම් කලාව නම්වු ශුද්ධ අයිතිය පාවාදුන් යුගයක් අපිට මෙනෙහි කිරීමට අපහසු විය.(අපේ දොසක් විය හැක)

කලාකරුවාට දේශපාලනය කිරීමට අයිතියක් ඇත.නමුත් එය පෞද්ගලික විය යුතුය.කලාකාර පෞර්ෂය, ප්‍රතිරූපය තුලින් දේශපාලනය කිරීමට යාම නිර්ලජ්ජිත වැඩකි. දේශපාලනය කිරීම සඳහා ජනතාමනාපය ඉල්ලා එය කුමන අයුරකට හෝ ලැබී පක්ෂයකට පූරිණ කාලීනව දේශපාලනය කරන කලාකාර දේශපාලකයන්ට අපි මෙහිදී දොස් නොකියමු. මන්ද ඒ සඳහා කැමැත්තක් සමාජ බහුතරයකින් ලබාගෙන ඇති බැවිනි.

ඒත්..

නිකරුනේ මුදල් කුට්ටියකට හෝ තනතුරකට,වරදානයකට ගිජුවී තම ආත්මයත් ප්‍රේක්ෂක සමුහයත් තම වෘත්තියත් අමු අමුවේ පාවාදී මලබෙරිහන් දෙන අජූත කලාකරුවන් ගැන අපි සාතිශයලෙස දුක් වෙමු.!

යුක්තිය,සාධාරණත්වය,යහපාලනය යන කාරනා ඇස්පනාපිට කඩකරන්නන් වෙනුවෙන් අතට හසුවන ඔනෑම පඩංගුවක් ගෙන කඩේ දුවන එවන් පුද්ගලයන් ගැන ප්‍රෙක්ෂකයා අවබෝධයෙන් යුතුව බලා සිටිය යුතුය.මන්ද ඔබේ මසැස තුලින් මනසට එබී යම් යම් විෂබීජ ඒතුල තැන්පත් කිරීමට ඔවුන්ට සහජ කුසලතාවක් ලැබී ඇති නිසාය.

කලාව නම්වු දේවතාවිය ජරාජීර්ණ,සල්ලාල දේශපාලක නම්වු රකුසා ඉදිරියේ නිරුවත් කරන මෙවන් අය කලාකරුවන් නොව කලා දෙවොලේ පඬුරු පෙට්ටිය දෙස ඇසගසා සිටින දෙවොල්කපුවන් වන්නේය.

(සංවාදයට විවෘතයි) www.kiripeni.blogspot.com

Sunday, November 2, 2014

පොඩි ගාණක් හදමු ද?

සෑහෙන කාලයකින් බුද්ධි කලම්භනයක් කරන්න බැරිවුන නිසා ඔන්න අපි පුංචි ගණිත ගැටළුවක් අරන් ආවා.
‍පහුගිය ඒවට වඩා නං හුඟක් ලේසි වෙයි.

ඕං එහෙනම් බලන්න පුළුවන් ද කියලා.... මේක පොල් ප්‍රශ්නයක්!

පොල් මිල ගැන නෙවි හරි ද?

Wednesday, October 22, 2014

කර්තෘ හිමිකම?

www.kiripeni.blogspot.com
අපගේ මෙම බ්ලොග් අඩවියේ ප්‍රචාරයවන ලිපි ආරම්භයේ සිටම "සිංහල බ්ලොග් කියවනය" නම් වන සින්ඩිකේටරයේ ප්‍රදර්ශනය වූ අතර එමගින් විශාල රසවතුන් පිරිසක් අප වෙත යොමු විය. නමුත් මෑතක සිට එම සින්ඩිකේටරයේ ලිපි පලවුන ද  යොමුවක් හෝ අවම වශයෙන් ලිපියේ හිමිකම හෝ ප්‍රදර්ශනය නොවේ.

මේ පිලිබඳව එය පවත්වාගෙනයනුලබන අය(Admin) දැනුවත් කල ද ප්‍රතිචාරයක් නැත!

එහි ප්‍රදර්ශනය වන සියළු ලිපි(අනෙක් අඩවි වල ලිපි ද) හිමිකම් අයිතිය අහිමිකරමින් ප්‍රදර්ශනය වෙමින් තිබේ.

ඉතා ඉහළ වටිනාකමක් ඇති සේවාවක් ඉටුකල මේ සින්ඩියට සිදුවූයේ කුමක් ද? තතු දන්නෝ පැහැදිලි කරත්වා.!

Tuesday, October 7, 2014

එහෙම පුළුවන් ද?

 (04/10/2014 සෙනසුරාදා ප්‍රචාරය කල ලිපියේ යාවත්කාලීන කිරීමකි)
අද නිවාඩු නිසා දවල්ට බඩ පිරෙන්න කාලා පොඩි ඇලට් එකක් දැම්මා. ඒක තමයි ඇලට් එක!!!
ඔන්න කාලෙකට පස්සෙ ආතගේ භූත ලෝකෙන් මැසේජ් එකක් ආපි!

මාර වැඩේ... ආතා හිරේ ලු.

මාත් ඉතින් ඥාති සංගිරහය දන්න මිනිහා වෙච්චි. අහක බලං ඉන්න ඇහිකියැ.දැම්ම විසිට් එකක් ඒ ලෝකෙට.

වැඩේ කියන්නෙ මං ඒ ලෝකෙට යද්දි මෙන්න ලෝයර් කෙනෙක් වෙලා. සන්තෝසයි නේ?

මම කෙලිංම කේස් එක බාරගත්ත..

වැඩේ සීරියස්.

Friday, September 26, 2014

වචනේ "පට්ට"



භාෂා ව්‍යවහාරයේ දි ද්විත්ව තේරුම් දෙන වචන අප කොතෙකුත් අසා ඇත. ඒත් මේ වචනය තරම් ජනප්‍රිය වචනයක් තවත් නැතැයි හැඟුන නිසා “පට්ට” ගැන ලින්නට සිතුවෙමු.

“නියමයි” , “මාරයි” යන වචන දෙකේ උපරිමය දැක්වීමට මෙන්ම එහි සම්පූර්ණ අනික්පස වන “වැඩක් නෑ” , “ෂික්” යන වචන වල තේරුමද අවස්ථානුකූලව විදහා දැක්වීමට මේ වචනය යොදනු පෙනේ.තවත් බොහෝ අතිශයෝක්ති අවස්ථා දැක්වීමට  කට වහරේ බොහෝ යෙදේ.

බලමු අවස්ථා ටිකක්...

Sunday, September 21, 2014

අහා!!! බදුල්ල...

2014 ඌව පළාත් සභා මැතිවරණයේ දී දකුණේ සහ බස්නාහිර පළාත්වල බුද්ධිමත් මිනිසුන්ට සමානව හෝ ඊටත් වඩා ඉදිරියට යමින් බල තුලනයට දායකවු විශේෂයෙන් බදුල්ලේ මෙන්ම අනෙක් දිස්ත්‍රික්කය වන මොණරාගල ජනතාවට අපේ උත්තමාචාරය!

සුවිශේෂි ලෙස අති බහුතරයක් ජනතාව ඡන්දය ප්‍රකාශකර තිබීම විශිෂ්ඨ ප්‍රජාතාන්ත්‍රවාදී ලක්ෂණයකි.

විපක්ෂයට ආකර්ෂණීය අපේක්ෂකයන් පැමිණිකල ඡන්දය ප්‍රකාශ නොකීරීමට සිටි පිරිස් පවා ඡන්ද පොලට ගිය බවත් ආණ්ඩුවේ ආකර්ෂණය ක්‍රමයෙන් අවරෝහණය වන බවත් මේ ඡන්දයේදී වඩාත් පැහැදිලිවී ඇත.

ඉහත දැක්වූයේ ඌව ඡන්දයේ සරළම සත්‍ය විග්‍රහය බව මැදහත්ව බලන සබුද්ධික පිරිසට පෙනීයනු ඇත.

නැවතත්, ඌවේ ජනතාවට ස්තූතියි!!!

Sunday, September 14, 2014

MG ට වෙච්චි දෙයක් !!

මව්බිම පුවත්පතේ 07/09/2014 “හදගැස්ම”අතිරේකයේ පළවූ ලිපියක් ඇසුරෙන් සම්පාදිතයි.

මුලින්ම කියන්න ඕන මව්බිම පුවත්පතේ මාධ්‍ය බාවිතාව ගැන පාඨකයින් ලෙස අපි(මාධ්‍ය ගැන ලොකු දැනුමක් නැතත්) එතරම් තෘප්තිමත් නොවන බව. ඒ අනුව මෙහි ඉහත දැක්වූ ලිපියේ සඳහන් ප්‍රකාශයන් MG ධනුෂ්ක විසින් ප්‍රකාශ කලා ද නැති ද යන්න අපි නොදනිමු. ප්‍රකාශකලා යැයි සිතා මේ ලිපිය ලියන්නෙමු.

Saturday, September 13, 2014

ආලයවන් සිතුමිණක් තව ඇත් ද?(නව ගී සංකල්පනා)

පෙම්බර බිරිඳක්... සුපෙම්වත් සැමියෙක්... ඔවුන්ගේ යුග දිවිය කෙබඳු වී ද? ඇය ඔහු ධනවතෙකු නොවන බව දනී... ඒත් ඇය ඔහු වෙත බැඳි පෙම අත් නොහැර ඔහුගේ සෙවනැල්ල යටට ආවාය.

ඔහු ඇයට සිය පණ මෙන් ආදරය කරයි... නමුත් සැප පහසුව සලසන්න වත්කම් නැත. සිත තැවෙයි..

ඇය ඒ සැප පහසුවට වඩා ඔහු හා විසීම සුවයක් සේ දැක තවත් ඔහුට සමීපවෙන්නීය. ඔහුගේ සිත තවත් ආදරයෙන් පිරෙයි. ඇය සුදු වැලි පාරක ඔහු සමඟ ඇවිද යයි. ඔහු මෙ‍ාහොතක් නවතී, ඇයට පිටුපසින් සිට ඇය පියවර තබන දෙස බලා සිටී...



පිණිකැට වැටිලා - සුදු වැලි කැටමත 
ඔබෙ නිරුවත් පා - සිඹියි සිඹියි

Monday, September 8, 2014

මෙන්න අනාවැකි....

අද (08/09/2014) දින හිරු අභිවන්දනා වැඩසටහන නැරඹු පිරිසට අපූරු අනාවැකි කීපයක් අසන්නට දකින්නට ලැබිනි. ඒවා සැබවින්ම අපූරුය!

නොදන්න අයට දැනගන්න ලියන්න හිතුවා.
බලන්න මේ අනාවැකි කොපමණ ප්‍රමාණයක් සත්‍ය වෙයි ද කියලා.
 
අපි නම් කියන්නේ මේ එකක්වත් සැබෑවෙන්න එපා කියලා(ජ්‍යෝතිෂකරු අමාරුවෙ දාන්න නෙවි)මොකද මේ සියල්ල ව්‍යසනයන් ගැන නිසා.හැබැයි වැඩසටහනට ආපු විද්‍යකුලපති මහතා නම් කියන්නේ මේවා අනාවැකි නෙවෙයි කියලා.

Sunday, September 7, 2014

මුරණ්ඩු හිත...(නව ගී සංකල්පනා)

ඇය ඔහු දෙසම බලාසිටියාය... ඔහු සමීපයේම පසුවිය. ඔහු ඇය දුටුවාද? ඇය දුටුව ද නොදුටු සේ සිටින්නට ඔහුගේ සිත ඔහු පොලඹවාලීය....

‍ඇය ඔහු සෙවූ ඈ ම නොවූ නිසා ද?

ඇය නොයෙක් ඉංගත පෑවාය. නමුත් ඔහු දැඩිව අන් යමක් සෙව්වේය... එය හමු වුණි ද? නැත....

ඇය ද සෙමෙන් ඔහුගෙන් දුරස්විය.

දැන් ඔහු නෙත් පිස දා තම නේත්‍රමානයේ සොයාබලයි. ඇය නැත!

මුරණ්ඩු සිත දැන් කියන්නේ කුමක් ද? සොයන්නේ කුමක් ද?


නෙතු අද්දර සිටිය කිරිල්ලී
දුටුවේ නෑ ගියා ඉගිල්ලි
නෙත් සෙව්වේ රන් මී මැස්සී
දැන් නං සිත ලෝබ දැනෙයි පුංචි කිරිල්ලී



නිතර නිතර දුටුව නිසා ඔබෙ රුව අරුමයක් නොවුනදෝ
නිතර නිතර ඇසුන නිසා ඔබෙ හඬ මිහිරක් නොවුනාදෝ
හතර වටින් සිටි මිතුරන් හින්දා ඔබ මගහැරුනා දෝ
වටින්ගොඩින් පාළු දැනෙන හින්දා දැන් ඔබ සිහිවී දෝ


නෙතු අද්දර...


අතර පතර සැරින් සැරේ ඔබ මා හට ඉඟි පැවාදෝ
අසුර ර‍ජෙක් විලසින් මා ඔබහට පිටු පෑවාදෝ
විසිර ගිහින් සියළු පැතුම් මා හද හිරි වැටිලා දෝ
ආදර සිත දොතට ගෙන කිරිල්ලියේ ආයෙත් ඔබ එනවා දෝ


නෙතු අද්දර...

ගී සංකල්පනාව: සම්පත් වීරතුංග ආරච්චි
විමසීම්:udan.sampath@gmail.com 

Thursday, August 28, 2014

විප්‍රයෝගය (නව ගී සංකල්පනා)

සිය කුළුදුල් ප්‍රේමය අහිමිව ගිය සිත්තරා සන්තාපයෙන් සිටිද්දී, ඇය ඔහු අබිමුව සිටියාය. තැවුනු හද අස්වැසුම් පතන්නට විය....
මහමෙරක් බලාපොරොත්තු ඈ සමගින් සිත්තර හද තුලට ඇතුළු වූයේ නිරායාසයෙනි....

ඔහු ඇගෙන් පැතුවේ එකම එක දෙයකි. ඒ අහිමිව ගිය ආදරයයි.

ඒත්....

ඇය ද ඔහු පැතූ දේම නොදී නික්ම ගියේ.... එම අකුරු හතර තවත් එක් වචනයක් පමණක් බව මිස හැඟුමක් ලෙසින් නොදැනුන නිසා ද?

මේ ඒ ප්‍රේමණීය සිත්තරා ඇගේ විප්‍රයෝගයෙන් පසු සිය හදවත සමඟ කල පිලිසඳරක් වේමය...

කඳුළු වලින් ‍තෙලිතුඩග තෙමා
සිතුවම් කල ඔබෙ රූප සොබා
වියළෙන්නට පෙර තුඩග පවා
ගිය හැටි පුදුමයි හද නවතා


සිත තුල සිර කර ආලනුරා
පවසනු නොහැකිය ලොව සපුරා
අස්වසමින් මා මනස සරා
සොයනෙමි ඔබගේ රුව පැහැරා


කඳුළු වලින් ‍තෙලිතුඩග තෙමා....



නික්ම ගියත් ඔබ මා හැරදා
තුටින් සිටී නම් සිනාසිලා
අඳුරු මතක සිඳබිඳ දාලා
හිනැහෙන්නම් ඔබ දෙස බලලා


කඳුළු වලින් ‍තෙලිතුඩග තෙමා....



සසර සරන්නට ඔබ සමගින්
පැතුවත් පැතුමන් සිතේ අගින්
ඉටුනොවනා බව දැනේ සැනින්
ඒත් මගේ හිත මැවේ විමන්


කඳුළු වලින් ‍තෙලිතුඩග තෙමා....

ගී සංකල්පනාව: සම්පත් වීරතුංග ආරච්චි
(විමසීම්:udan.sampath@gmail.com)

Saturday, August 16, 2014

ජයවැඩූ මිනිසකුගේ ටෙස්ට් ඉනිමක නිමාව

මහේල ජයවර්ධන.
...................................................................

කවුද නොදන්නෙ?   

තවත් විස්තර කරන්න දෙයක් නෑ.


Thursday, August 7, 2014

අනේ දරුවනේ නාඩං කියූ ඇමතිලා!

පාර්ලිමේන්තු මන්ත්‍රී අනුර කුමාර දිසානායක අද(07/08/2014) පාර්ලිමේන්තුවේ දී දරු ප්‍රශ්නයක් නැගුවේය. අපේ අහිංසක මැති ඇමතිවරුන්,ප්‍රභූවරුන් සිය දාරක ප්‍රේමය වාවනු බැරිව තම කිරිකැටියන්ට ලබා දී අැති තනතුරු,වරදාන මෙහිදී හෙළිකෙරිනි.

පව් අප්පා...!

අපි විස්තර කරන්නෙ මොකටද? ඔයාලම බලන්නකෝ.(විලි ලැජ්ජාව වැඩි සංවේදී අය බැලීමෙන් වලකින්න.. ඔබේ හයහතර නොදත් අහිංසක දරුවන් මෙය දැකීමෙන් ඔබෙන් ද මෙම වරදාන ඉල්ලීමට හැකි බැවින් ඒ බව කියා දෙන්න.)

උපුටාගැනීම- සිරස"නිව්ස් ෆර්ස්ට්" වෙබ් අඩවියෙනි.

වීඩියෝව දර්ශණය නොවේ නම් මෙම අතුරු පිවිසුම භාවිතා කරන්න...  https://www.youtube.com/watch?v=0KKzHQkh_BU&feature=player_detailpageවීඩියෝව බලන්න පිවිසෙන්න

Wednesday, August 6, 2014

තාත්තා...

පිය සෙනෙහසට කවි ගී ලියැවුනා මදී...

ඔබටත් එසේ සිතුනු අවස්ථා තියනවා නේ ද? එසේනම් ඒ අඩුව පුරවන්න උත්සාහයක් හෝ ගනිමු!

ඔයාගෙ අදහස කුමක් ද? ලස්සන තනුවක් දාලා, සුන්දර හඬකින් ගීතවත් කලොත්...?

Saturday, July 26, 2014

M.G සහෝදරයාටත් චන්දිමා සහෝදරියටත් උණුසුම් සභ පැතුම්!

පසුගිය දා නිමාවුනු දෙරණ ඩ්‍රීම් ස්ටාර් තරඟාවලියේ සිහින තරුව බවට කිරුළු පැලැන්දේ අඹිළිපිටියේ සිට පැමිණි එම්.ජී. ධනුෂ්ක බව මුළු රටම නොව ලෙවම දන්නා කරුණකි. එසේ නම් මේ දැන් පමා වී සුබ පතන්නේ  කුමණ කරුණක් නිසා ද? අපිට සිහින තරු,සුපිරි තරු ගැන අපූරු ඉතිහාසයක් තිබෙන නිසාය.බොහෝ සුපිරි තරු බිහිවු පසු මුලින් කළ කී දේ උඩුයටිකුරු කරණ ඉතිහාසයක් අපිට තිබේ.එසේ හෙයින් ධනුෂ්ක සම්බන්ධයෙන් ද අපිට සාධාරණ සැකයක් ස්වල්ප ලෙස හෝ තිබීම සුබ පැතුම් තැබීමට පමා කීරීමට අපිට සිත් ඇති කලේය.

නමුත් දැන් යම් කාලයක් ගතවී ඇත. ධනුෂ්ක සම්බන්ධ තොරතුරු සහ ඔහුගේ අදහස් තරඟයට පෙර සහ පසු අතර විශාල විචලනයක් නොවී තිබීම ඔහුට අපගේ හද පිරි සුභාශිංෂන පිරිණමන්නට හේතු කාරණා සපයයි. තම අගහිඟකම් පලිහක් නොකර ආශිර්වාදයක් කොටගත් මේ සුන්දර තරුණයා ගේ සුවිශිෂ්ඨ ජයග්‍රහණය සැබෑලෙසම සියළු ශ්‍රී ලාංකික සංගීත රසිකයන්ගේ අමන්දානන්දයට හේතු විය. හදවත රත්තරන් ජෝති,එම්.එස්,රූකාන්ත වැනි ජනාදර චරිත අතරට එක්වු එකම රියැලටි තරුව බවට එම්.ජි පත්ව තිබේ.

ඉතින් සහෝදරයා ඔබේ ගායනයට,රංගනයට සේම ‍ඔබේ සුපසන් අදහස් හා අවංක පෙනුමට ආකර්ෂණය වු ප්‍රේක්ෂක සමුහයා මුලා නොකොට,ඔවුන් ගේ නොමද ආදරයත් රැකගෙන ඉදිරිට යන්නැයි අපි සුභ පතමු.

තවත් යමක් නොකියාම බැරිය, බොහේ කලාකරුවන් කලා සේ පවුල් සංස්ථාව අවුල් නොකරගන්නටත්,දේශපාලන පක්ෂ වල ඉත්තකු නොවන්නටත් ඔබට හැකි විය යුතුය. මන්ද අද ප්‍රේක්ෂකයා වඩා සංවේදී හා බුද්ධිමත් පිරිසක් වන බැවිනි.

*******************************
දැන් බලමු මේ චන්දිමා කවුද කියලා. ඊයේ(25/07/2014) සිරස ලක්ෂපති බලපු අය නම් ඇය කවුදැයි දන්නවා ඇති.

ඇය උත්සාහවන්ත තිදරු මවක්. මේ වන විට රු.මිලියනයක් දිනා මිලියන දෙක අබිමුව සිටින්නියක්. තමන් උසස්පෙළ ලියන්නට සිටි අවදියේ වැලඳුන අසාමාන්‍ය රෝගයක් නිසා සාර්ථකව එය කරගත නොහැකි වීම ගැන පසු තැවෙමින් අනාගත දිනක තම දියනිය සමග ඒ කඩ ඉමට මුහුණ දෙන්නට වෙර දරන්නියක්

නමුත් ඇය දැන් බුද්ධිය, දැනුම තිබෙන්නේ සහතික පත්‍රයක නොව තම සිත තුල බවත් අධ්‍යාපනය යනු හුදෙක් උපාධියක් පමණක් නොවන බවත් ලොවටම හෙලිකොට ඇත.

ලබන සිකුරාදා (01/08/2014) ඇය සජීව ලෙසින් තරඟයේ අවසන් පැනයට මුහුණ දෙනු ඇති. අපි ඇයට සුභ පතමු.!

*****************************
මෙවන් තරඟ සංවිධානය කරමින් සැඟවුනු දක්ෂයින් කළඑළි බස්සන දෙරණ මාධ්‍ය ජාලයටත් සිරස මාධ්‍ය ජාලයටත් අපි ස්තූතිවන්ත වෙමු.

Saturday, July 5, 2014

වතුසුදු

ටිකකාලෙකින් මොකුත් ලියන්න බැරිවුනා.ලියන්න බොහෝ දේ රටේ නම් සිදුවුනා.ඒත් ඒ දේවල් පිළිබඳ කතාකිරීමත් බොහොම අප්‍රසන්න නිසා අපි අපේ අත්වලට අපිම විලංගු දාගත්තා.

අපි ප්‍රසන්න ‍දෙයක් කතා කරමු!

"මල්"

මල් කිව්වහම ඉතින් කොල්ලන්ගෙ කෙල්ලන්ගෙ මූණු මල් වගේ පිරිලා ඉහේ මලක් පිපිච්ච ගානට එනව නේ.
ඒත් අපි කියන්නෙ ෆෝන් එකෙන් කඩන ඒ මල් ගැන නෙවෙයි.ගස්වල හැදෙන සුවඳ හමන සැබෑ මල් ගැන.

ඇත්තටම මල් හැදෙන්නෙ මොකටද?

5 වසරෙ පොඩි එකෙක්ගෙන් ඇහුවත් කියයි නේ?!

මල් තමයි සපුෂ්ප ශාඛවල අනාගත පැවැත්ම තීරණය කරන්නෙ,නේද? ඒකියන්නෙ මල්පරාගණය වෙලා හැදෙන ඵල තමයි ඒ ඒ ශාඛවල මීලඟ පරම්පරාව බිහි කරන්නෙ. ඒක තමයි සරළව ගත්තොත් මලකින් ගසකට ඇති ප්‍රයෝජනය.

ඒත්...

එම ප්‍රයෝජනය නොදෙන මල් ද ගස් විසින් ලොවට තිළිණ කරනවා. කවුරුත් දන්න "වතුසුදු" මල් කිසිම දිනක ඵල දරණව ද? එසේනම් ගසට ඉන් ඇති ප්‍රයෝජනය කුමක් ද? සුවඳක් ද නැති මේ මල කුමණ කරුණක් උදෙසා පිපෙන්නේ ද? බෞද්ධයා බුදු පුදට ගැනීම වෙනුවෙන් යොදා නොගන්නට මේ මලින් ගසේ ප්‍රචාරණයට සෙතක් වේ ද? බෞද්ධයින් නැති ලොවක ගසේ පැවැත්ම තහවුරු කරන්නෝ කවුරුන් ද?

නමුත් වතුසුදු ගස ලොවට එක් ආදර්ශයක් දෙයි, එනම් තමාට පලක් නොවුන ද මිනිස් පිරිසකට විපුල ඵල ද කෘමි සතුන්ට අහර ද සපයන දෙයක් තව දුරටත් සිය ශක්තිය වැය කරමින් දරා සිටීමයි. වතුසුදු ඇත්තටම පින්වත් ශාඛයකි.

ඔබේ අදහස කුමක් ද?

Thursday, June 12, 2014

පබිලිස් ගේ අබිලික් වැඩ.

අද පොසොන් පුන් පොහොය දිනයයි. අනුබුදු මිහිඳු හිමියන් ලක් දිවට වැඩමවා ලංකාව සියළු සතුන්ට අභය භූමියක් මෙන්ම බුද්ධිමතුන්ට නිවන් මග පෙන්වන ක්ෂේම භූමියක් කළ බව ඔබ අප සැවොම දනී. ඉතින් එදා සිට අද දක්වා සැදැහැවත් බොදු ජනයා පොහෝ දිනයට බොහෝ පිං කම් කරති. ඒ පිං කම් විවිධ ස්වරූප ගත්තත් කෙසේ හෝ හොඳ දේ කෙරෙන නිසා අපි මැදහත් සිතින් ඒ දෙස බලා තුටු වෙමු.

ඒත්...

අද අපි මහත් කණගාටු දායක පිං(හෝ පව්)කමක් දුටිමු. ඒ හිරු ශ්‍රද්ධාභිවන්දනා වැඩසටහන අතරතුරයි. රටේ නමක් දිනා සිටින සූපවේදි පබිලිස් සිල්වා ප්‍රමුඛ පිරිසක් සෝමාවතී සෑරදුන් වෙත බුද්ධ පූජාව ලෙස "තිරුවානා ගල්" හොද්දක් පූජා කිරීමයි.

ඔහු දක්ස සූපවේදියකු (ගමේ බසින් "වැඩ්ඩෙක්") විය හැකිය. ඔහුට ඕනෑම දහ ජරාවක් ආහාරයක් බවට පෙරලා නමක් යොදා මේ රටේ සිටින තෘණ භක්ෂක මනුසතුන්ට පිලිගැන්විය හැකිය.ඒ ඔහු මාධ්‍ය මගින් ඒ තරමටම පුම්බා ඇති බැවිනි.

නමුත්...

අනන්තජින වූ තුන්ලොකාග්‍ර වු ‍ගෞතම ශ්‍රී සම්මා සම්බුදු රජාණන්වහන්සේගේ දක්ෂිණ ශ්‍රී දළදා වහන්සේ වැඩ වෙසෙන සෝමාවතී සෑ රදුන්ට ගල් හොදි පූජා කරන්න ඔහුට හයියක් ආවේ කෙසේ ද? අප බුද්ධ පූජා තබන්නේ හිස් ගඩොල් ගොඩවල් වලටවත් මැටි ගොඩවල් හෝ ලෝහ ගොඩවල් වලට නොව සම්මා සම්බුදු රජාණන්වහන්සේට ය,උන්වහන්සේගේ අනන්ත ගුණ මහිමයටය.

ඉතින් අද බුදු හිමි වැඩ සිටියානම් ඔය පබිලිස් උන්වහන්සේට ගල්හොදි පුදයි ද? පිදුවත් මේ මුග්ධයා කෙරේ ද පතල මහා කරුණාවෙන් උන්වහන්සේ එය පිලිගනු ඇත. ඒත් පුහුදුන් අපට මෙය මහත් වේදනාවකි, මේ බූ...ට බුදුන් පුදන්නට වෙන දෙයක් මේ රටේ නැති ද? අඩුම ගනනේ දළදා මාලිගාවේ මෙවන් පූජාවක් තබන්නට එම ස්ථානයෙන් මොහුට අවසර ලැබෙයි ද? නැත! එසේ නම් ඇයි සෝමාවති පුද බිමේ මෙම අඩු සැලකිල්ල!

හිරු මාධ්‍ය ජාලයේ පාලකයින් ගේ තරම ද අද ලොවට හෙලි වුනා යයි අපට හැඟේ.අමුලිකා ශ්‍රද්ධාවේ තරම...!

අපේ අදහස නම් හිරු ආයතනයත්,මැටි මෝල් පබිලියාත් සියළු ලෝකවාසි බෞද්ධයන්ගෙන් සමාව ගතයුතු බවයි.

ප.ලි.(13/06/2014 - 20:44)
මේ පිලිබඳ වැඩි දුර තොරතුරු සඳහා පහත ලින්ක් එක භාවිතා කරන්න... එහි 4වන විනාඩියට පසු හොඳින් බලන්න.
http://www.youtube.com/watch?feature=player_embedded&v=U63ktcPj6eY&list=PLN-MLMEqduVnW-Usb_vz9wuA3wpvU2Mwk
                                                                             

Sunday, June 8, 2014

ගම්මංපිලගේ සීයේ අය-වැය කෝ?!

ආරිය සිංහල ඇඳුමින් සැරසී නිබඳ සිනා මුවින් අප අමතන සුපේෂල ශික්ෂාකාමී පරම පවිත්‍ර දේශපාලක උතුමෙකු වන උදය ප්‍රභාත් ගම්මංපිල මහතා පසුගිය බස්නාහිර පළාත් සභා ඡන්දයට ඉදිරිපත් වූ බව සියළු ලාංකිකයන්ට(විශේෂයෙන්ම සිහළුන්ට) මතක ඇතැයි අපි සිතමු.

එතුමානෝ ඡන්ද වියදම් සෙවූ ආකාරය මතක ද?

හුදී ජනයා සිය පහන් සංවේගයෙන් රුපියල් සියය බැගින්(අවම) පිරිනැමූ බවත් දිනෙන් දින ගිණුම වර්ධනය වූ බවත් ඡන්ද කාලයේ නැවුම් වීදුරු තහඩුවක් මෙන් පැහැදිලි විනිවිද ස්වභාවයකින් ඉදිරිපත් කෙරිණි.තමා ඡන්දයට පසුව(මතක ඇති පරිද මාසයකින්) මේ සීයේ සාධු ගිණුමට සිදුවූ දේ "අය-වැය" ලෙස ඉදිරිපත් කරනුලබන බව සූකිරි සිනා මුවින් ම පැවසූ බව අපිට දැන් ඡායාමාත්‍ර ලෙස මතක් වන්නේය. මේ ලිපිය කියවන ඔබ යම් ලෙසකින් එම වාර්ථාව දුටුවේ නම් අපව ද දැනුම්වත් කරනලෙස ඉල්ලා සිටිමු.

ඇතැම් විට ඔවුන්ගේ ධර්ම රාජ්‍යයේ කාලය අපේ ඔරලෝසු වේලාවට වඩා වෙනස් වීම හේතුකොට තවම ඊට කාලය නොපැමිණි නිසා ඉදිරිපත් නොකලා ද විය හැකිය.ඇතැම් විට තවම ගණිනවා විය හැක.මන්ද එතුමාට ඇති ගිණියනොහැකි වැඩ අතරේ ලැබෙන සුළු විවෙිකයේ දී මේ කටයුතු ද කෙරෙන නිසා පමා විය හැකි බව අප තේරුම් ගතයුතු බව මේ ලියන අතරතුර තේරුම් ගියෙමු.

"සිංහලයාට ඕනෑම දෙයක් මතක තියන්නේ මාසයයි" යනුවෙන් කිසියම් අමනයෙකු කී බව සිංහලයන් ලෙස මතක තිබීම අපිටම පුදුමයක් වුවත් සිංහලයන් ගැන හොඳින්ම දන්නා එහි උරුමකරුවන්ට එය ලියා තබාගෙන නිතර මෙ‍නෙහි කරන පිරිසක් ලෙස මෙවන් උතුමන්ලා ද පුදුම වනු ඇති ද?

සියයේ අය-වැය නොදුටු පිරිසක් ලෙස අපිට පැවසිය හැකි එකමදේ නම් "සිනහවෙන් හෝ කථාවෙන් බෑ මනින්නට මිනිසා" යන්න පමණි.

දකුණේ අපිට නම් මේ පිලිබඳ ලොකු දුකක් නැතත් මෙසේ මේ ගැන සිහිපත් කලේ සිංහලයා ගැන ඉහත අමන ප්‍රකාශය කල ත්‍රස්තවාදී අමනයාගේ කථාව බොරු කිරීමට හා බස්නාහිර මිනිසුන් ගේ අදහස දැනගැනීමටත් පමණි...





Sunday, May 18, 2014

බියෙන් තොර රටක් වෙනුවෙන් වෙහෙසුනු ඔබට උපහාර වේවා!

රට ජාතිය කුරිරු ත්‍රස්තවාදයෙන් ගලවාගැනීමට වෙහෙසුනු සියළු රණවිරුවන්ටත් ඒ පිටුපස සිටි අතිගරු ජනපති ඇතුළු පාලනාධිකාරියටත්,සියළු හමුදාපතිවරුන්ටත් අපේ උපහාරය...


අපිට තව පුංචි දෙයක් හිතුනා, අද රණවිරුවන් පීඨිකාවෙ තියලා මැති ඇමතිවරු,මහ ජනතාව පෙළපාලියේ ගියානම් නියම උපහාරයක් වෙයි නේ!!!

උපහාර ලද යුත්තන්ම උපහාර ලබත්වා...

මොකද හිතන්නෙ?

Tuesday, May 13, 2014

නමාමි බුද්ධං!!!

තිලොවට සණරාමර සුව කැන්දූ අමාමෑණී ලොව්තුරා සම්මා සම්බුදු රජාණන්වහන්සේ ගේ තෙමගුල එනම් සිදුහත් උපත,ගෞතම සම්බුද්ධ නමින් බුදු වීම,මහා පරිනිර්වාණය යන කාරණා සිදුවු වෙසක් පුන් පොහොය දිනය හෙටයි.

සාරාසංඛ්‍ය කල්ප ලක්ෂයක් පෙරුම්පුරා ප්‍රඤ්ඥාධික බුදු වරයකු වන්නට මහාමායා දේවියගේ කුස පිලිසිඳ ගන්නට පෙර බෝසතාණෝ තුසිතදෙව්ලොව වැඩසිටි සේක.දේවාරාධනය අනුව පංචමහාවිලොකනයෙන් සුදුසු කල එළැබි බව වටහාගත් එතුමාණෝ මනුලොවට සම්ප්‍රාප්ත වීම සිදුකළහ.

කිඹුල්වත් නුවරත් දෙව්දහ නුවරත් අතර ලුම්ඹිණි සල් උයනේ දී සිය අවසන් භවය වන සිදුහත් බෝසත් උත්පත්තිය සිදුවිය.අපායේ ගිණිදැල් පවා මොහොතකට නිවී ගියේ ය.මිහිමව සිය උත්කෘෂ්ඨ මනුෂ්‍යරත්නය  පිලිගත්තේ නෙළුම් මල් පිරි දොතිනි.

මහත් ආශ්චර්යයන් සිදුකරමින් සිදුහත් කුමාරයාණෝ යෙහෙන් උගත් අතර නිසි කළ දී ජාති ජාතිත් පතා ආ තරැණිය,යශෝධරා දේවිය සමග විවාපත් විය.

කල් ගතවත්ම සතර පෙරනිමිති සහ නලඟනන්ගේ විප්‍රකාර දැක සසර පිලිඹද කලකිරුණු බොසතාණෝ සිය පුත් රාහුල කුමරු උපන් දින කන්ථක අසු පිට නැගී ඡන්න ඇමති සමඟ මහා අභිණිෂ්ක්‍රමණය කලහ.

පසුව විවිධ ආචාරවරුන් යටතේ සත්‍යාවබෝධයට උත්සාහ කල එතුමාණෝ,ඒ කිසිවකු සතුව තමා සොයන සත්‍ය නොමැති බව වටහාගෙන තනිවම ඊට උත්සාහ දැරීය.සය වසක් අති දුෂ්කරක්‍රියා සිදුකළ එතුමාණන්ට පස්වග මහණුන් උපස්ථාන කලහ.

දුෂ්කර පිලිවෙතේ අසාර්ථක බව වටහාගත් බෝසතාණෝ මැදුම් පිලිවෙතට පිවිසියාහ.පස්වග මහණුන් නික්මුනි.

වෙසක් පුන්පොහෝ දිනට පෙර දින දී සුජාතා සිටු දුවගේ කිරිපිඬු දානය වැලදු බෝසතානෝ චතුරංගසමන්නාගත වීරියෙන් ඇසතු රුක් මුල වැඩ භාවනානුයෝගී විය.දුක,දුකට හේතුව,දුක නැති කිරීමේ මග,දුක නැති කිරීම යන චතුරාර්ය සත්‍ය අවබෝධකරගත් උතුමාණෝ භව ගමනේ රඳවා තබන තණ්හා,මෝහය,භය ආදි බැමි කඩා භවගාමි ගෘහයේ කැණිමඩල ද කඩා බිමට සමතලා කල දැමූහ. මාර සේනාව නොයෙක්‍ වෙස් ගෙන උතුමණ් නැවැත්වීමට හැදුවද එය නිෂ්ඵල විය. මිහිකත කම්පා කරමින් බෝසතාණෝ බුද්ධත්වයට පත්විය.....වෙසක් පොහෝ දිනය උදාවී තිබිණි... ඇසතු ගස බෝධීන්වහන්සේ විය.

බුදුන් වහන්සේ පන්සාලිස් වසක් ගම් නියම්ගම් සැරිසරමින්,අසරණ භවගාමි ජනයා භවදුකින් මුදවාගැනීමට සූඅසූහාරදහසක් වූ පරිපූර්ණ වූ බුද්ධිමතුන්ට අවබෝධපිනිස වන්නාවු ධර්මස්කන්ධයක් දේශනාකොට වදාළාහ.

අසු හතර වන වියට පිවිස රෝගි සහ වයෝවෘද්ධව සිටි තථාගතයාණෝ මහත් වෙහෙස ගෙන මල්ල රජදරුවන්ගේ උපවර්තන නම් සල් උයනට පිවිසි සේක.සල් ගස් දෙකක් අතර ආසනයක් පනවාගත් උන්වහන්සේ. භික්ෂු සංඝයා අතුලු රැස්ව සිට දෙවි මිනිස් සියල්ලන්ටම දම් දෙසු සේක. අළුයම් යාමයේ නැවතද මහ පොළව කම්පා කරමින් අහස ගුගුරුවා ලමින් සෝ පලකරද්දී සමාපත් සුවයට පිවිස, පිරිනිර්වාණය කල සේක.
"වයධම්ම සංඛාරා-අප්පමාදේන සම්පාදේත" සියළු සංස්කාරධර්මයෝ නැසෙන සුළුය-නොපමාව කුසල් දහම් වඩන්න..... ඒ අවසන් බුද්ධ වචන යයි.

ඉතින් බෞද්ධයිනි ඔබ නොපමා විය යුත්තේ නොවේ ද....? කිතුබැතිමතුනි ඔබ ද ඉස්ලාම් බැතිමතුනි ඔබ ද කුමන අන් ආගමක සිටියත් ඔබ මිනිසකු නම් නොපමා විය යුතුමය. සම්බුද්ධ දේශනාව ආගමක් නොව සනාතන දහමකි.අවබෝධ කර ගනිත්වා!

(බුද්ධිමතුනි, සදොස් තැන් වෙතොත් නිදොස් කරනු මැනවි.)


video

Tuesday, May 6, 2014

ගානක් හොයාගන්න පොටක් !?!

අළුත් වැඩක් සෙට් උනා... මේක මේ අන්තර්ජාල මුදල් ඉපයීම් ක්‍රමයක්. ඇත්ත බොරු තාම දන්නෙ නෑ. මේ අත්හදා බැලීමක් විතරයි.









Payloog කියලා අයතනයකින් තමයි කරන්නෙ. ඇඩ් ක්ලික් කිරීමක් නෙවි. එයාල සමග ලියාපදිංචි වෙලා එයාලගෙ ලින්ක් එකක් සමාජ ජාල හරහා ප්‍රචාරය කිරීමයි කරන්න තියන්නෙ.

බලමු අපිට සල්ලි ලැබුනොත් ඔයාලට "අනිවා" කියනවා..රැඳෙන්න අපි සමඟම.

(මේ වැඩේ කලින් කරපු අය ඉන්නවා නම් අපිවත් දැනුම්වත් කරන්න)

http://payloog.com/?invite=435907

Friday, April 25, 2014

අාණ්ඩුවට කැසිනෝ... විපක්ෂයට කසනෝ... අපිට ඇඬෙනෝ!

උපායමාර්ගික සංවර්ධන පනත වශයෙන් හෝ කැසිනෝ පනත වශයෙන් හෝ හඳුන්වන පනතක් රජය නැවත ගෙන එනවා ලු.එහි අන්තර්ගතය කෙබඳු දැයි මහජනතාව සත්‍යවශයෙන්ම නොදනී. විපක්ෂය එකක් කියයි.රජය තවෙකක් කියයි.අපි කුමක් විශ්වාස කරමු ද?

දෙපැත්තේම අය කියනදේ කරන,කරනදේ කියන ස්වභාවය අතින් අපේ හදවත් එ් තරමටම දිනාගෙන ඇත.

පැකර් නම් කුප්‍රකට ව්‍යාපාරිකයා සම්බන්ධයෙන් අත්තේ එතරම් යහපත් පිලිගැනීමක් නොවන නිසා ඔහුගේ පැමීනීම සිදුවන්නේ නම් විපක්ෂයේ අදහස් පැත්ත බරවන්නේය.අනික පැකර්ට දෙන්නේත් දැනට අනිකුත් ව්‍යපාරිකයන්ට දෙන සහන නම්,රජය දහ අතේ දිව්රන පරිදි කැසිනෝ ද නැති නම් අළුත් පනතක් කුමටද?

ප්‍රධාන විපක්ෂයේ ඉතිහාසය අනුව ගත්කල ඔවුන් බලයේ සිටියදි පැකර් ආගමනය වුවානම් ඔවුන් පැකර්ට රතුපලස් එලා මල් දම් පළඳවා පිලිනොගනිතැයි සිතිය හැකි ද?

විපක්ෂයට කැසීම සෑදෙන්නේ ආණ්ඩුව කැසිනෝගසන විටදීය. මේ දෙස බලා සිටින ජහමනයාට ඇඬෙන්නේය.

Wednesday, April 9, 2014

අවුරුදු , ජ්‍යෙතිෂ්‍ය සහ නොනගතය!

සිංහල අවුරුද්දට සාප්පු සවාරි ගිහින් දැන් කවුරුත් අවුරුදු සමරන්න සූදානම් ඇති කියලා අපි හිතනවා. ජ්‍යොතිෂ්‍ය අනුව සූර්යයා මීන රාශියේ සිට මේෂ රාශියට සංක්‍රමණය වීම ලු   අවුරුද්ද කියන්නෙ (අපි දන්න විදියට නම් සූර්යයා කොහේවත් යන්නෙ නෑ). කොහොම හරි කමක් නෑ කියමු කෝ... 

මේක නේ පුරස්නෙ!

අපේ මේ නැකැත් අතර පුණ්‍යකාලය එහෙමත් නැත්නං නොනගතය කියලා කොටසක් තියනවා නේ ද? ඒ කියන්නෙ නැකැත් නැති වෙලාව ලු! මාර වැඩේ කියන්නෙ අනිත් අවුරුදු නැකැත් සේරම යෙදෙන්න‍ෙ මේ කාලය ඇතුලතමයි!

මේ පාර 14 වෙනිදා උදේ 1.13ට පටන්ගන්න නොනගතය හවස 2.01 වෙනකල් තියනවලු මේ කාලේ කිසිම වැඩක් හොඳ නෑ ලු. කරුමෙ කියන්නේ වැඩ අල්ලන නැකත එ‍න්නෙ 14 උදේ 11.05ට නොනගතේ වැඩ කරන්නෙ කොහොමද? හැම සැරේම මෙහෙම තමයි.

එක්කො අවුරුදු උදාවෙන නැකතින් නොනගතය ඉවරවෙන්න ඕන!(අපිට හිතෙන විදියට) මේකෙ පොඩි අවුලක් තියනවා නේ ද?

අනික මේ සැරේ ලිප ගිණි මොලවලා (‍උදේ 10.17ට) කෑම මේසෙට 11.05 වෙද්දි තියන්න ඕන.විනාඩි 48 විතර තමයි තියන්නෙ... දර ලිප ඇවිලිලා,නැවුම් මුට්ටිය රත්වෙලා,කිරිබත ඉදෙන්න මේ කාලය ඇති වෙයි ද? ජ්‍යොතිෂ්‍යකරුවො ගෘහණියගෙ අපහසුව දැක නැති ද? ‍ආහ්... ඔව් නේ එයාලා කොහොමත් ගෘහණියව අවුරුදු නැකැත් වලින් හලලා නේ තියන්නේ. ඇයි වැඩ අල්ලන නැකතට කලින් ලිප ගිණි‍මොලවන නැකතෙදි ගෘහණිය වැඩ අල්ලා ඉවරයි නේ.

අනේ ‍කාට කියන්න ද මේ ජ්‍යොතිෂ්‍ය විගඩම්!

Friday, April 4, 2014

ප්‍රවේෂම්වන්න!!!

ලාංකීය ජනගහනයෙන් වැඩි ප්‍රමාණයක ගේ උත්කර්ෂවත් සමය දැන් එළැඹී ඇත.එනම් සිංහල සහ හින්දු අළුත් අවුරුදු සමයයි.එදා ගමට වසන්තය උදාවන බව පවසා සිටියේ කෝකිල නාදයයි. අද එම නාදය ඇසුනත් ඒ ඇසෙන්නේ කොවුල් තුඩකින් නොව රූපවාහිනියෙන් හෝ ගුවන්විදුලියෙනි. අල්පේජ්‍ය දිවිපෙවෙතක් ගතකල එදා ගැමියා තම නිවස පිලිසකර කර තම දුදරුවන් සහ හිතමිතුරන් සමග අහිංසක සතුටක් විඳිමින් ජීවත්වු එම යුගය නිමා වී ඇත.80 දශකයේ සිදුවු විවෘත ආර්ථික ප්‍රතිපත්ති හඳුන්වාදීම නිසා මිනිස් සිතුම්පැතුම් සංකීර්ණ විය.
වෙළඳපොල ආර්ථිකය විසින් ඔබව දැඩිලෙස හසුරුවන සමය දැන් එළැඹී ඇත. ඉදිරි දින කීපයේ දී සෑම අයෙකුම අතේ අතිරේක මුදල් ගැවසෙන බව ඔවුන් දනිති(බෝනස්).දැන් ඔවුන් ඒ මුදල ඔවුන් දෙසට හරවා ගැනීමට විවිධ උපක්‍රම යොදනු ලබයි.ඔබේ අවුරුදු අවසන් වන්නේ ඔවුන්ට අවුරුදු උදාකරමිනි.

සේල්- පැරණි මිල වැඩිකොට සඳහන් කර නැවත කපාදමා අළුත් මිලක් ලෙස පෙන්වීම.

එකක් ගත්තම මොකක් හරි නොමිලේ- දෙවනුව ‍නිකන් දෙන භාන්ඩයේ අගයත් මුල් භාන්ඩයට එකතුකර තිබීම.

පරණ එකට වට්ටමක්- මිල වැඩිකර දක්වා ඇති භාන්ඩයකට එහිම පැරණි භාන්ඩයක් ලබා දුන්විට වට්ටමක් ලබා දීම.(කුණුකන්දල් ඉවත්කර ගැනීමට නම් හොඳයි)

මේ ආදි විවිධ ක්‍රම මගින් පාරිභෝගිකයා ගොනාට ඇන්දවීම මගින් ඔහු සතු මුදල සූරා ගැනීම මෙමගින් සිදුවේ.

එපමණක් නොව නව මාදිලි හඳුන්වා දී ඔබේ ඇස් ගිණිකණ වට්ටවා ඔබට අත්‍යාවශ්‍ය නොවන දෙයක් ඔබට දී අත්‍යාවශ්‍ය කටයුත්තක් සඳහා යෙදවිය හැකි මුදල් ඔබට අහිමි කීරීමට ද මේ වෙළඳපොල ක්‍රමය පසුබ ට නොවනු ඇත.

එසේම වෙළඳපොල සවාරි යන ඔබේ මුදල් ගැට කපන්නන්ගෙන් පරිස්සම් කරගන්නත් ඔබ වගබලා ගතයුතුයි.මතක තබාගන්න ඔවුන් ද මෙම ක්‍රමයේම අතුරු නිෂ්පාදනයක් බව.(නැත්තෝ ඇත්තන්ගෙන් සොරා ගන්නේ ද විච්චූරණ ගැනුමට නොහැකිවු කලය)

මුලින්ම අවශ්‍ය දේ ලැයිස්තු කරන්න,එයින් අත්‍යාවශ්‍ය දේ තෝරාගන්න.මුදල් ඉතුරු කරගන්න... මොකද අප්‍රේල් 14 දිනෙන් ලෝකය පරිභ්‍රමණය අවසන් නොවන නිසාත්... ඔබත් ලබැඳියනුත් රටට ණය නොවී සිටිය යුතුනිසාත් ය.

හැකිනම් සුරාවට යොදන්න ඉන්න මුදල පිනකට දහමකටවත් දෙන්න... ඔබට සතුට දෙන්නට සුරාවට වඩා එයට හැකි වේවි.

සැහැල්ලු නව වසරක් වේවා!!!!





Sunday, March 30, 2014

බුද්ධි පරීක්ෂණයේ ප්‍රතිඵල නිකුත් වුනා.... ඔයා පාස් ද?

පසුගිය සතියේ අපි පැවසු බුද්ධි පරීක්ෂණය ඊයේ(29/03/2014) පැවැත්වුනා. අද ප්‍රතිඵල නිකුත් වුනා. ලියපු අය කවුරුත් සතුටු ඇති නේ ද? ඇයි මොන විදියකින් හරි සෑහිමකට පත්වෙන්න පුළුවන් ප්‍රතිඵලයක් නේ ආවේ!

දෙපාර්තමේන්තුවට අනුව සමස්ථය ගත්තාම 55% ක් විතර සමත් ලු. 45% විතර අසමත් ලු... ඇත්තටම සමත් මොන පිරිසද කියලා අපි කාටත් ඉස්සරහට අත්දැකීමෙන් ම තේරුම් ගන්න පුළුවන් වෙයි.

හරි...

අපි බුද්ධි පරීක්ෂණය කිය කියා මේ දොඩවන්නෙ දකුණු හා බස්නාහිර පලාත් මැතිවරණය පිලිබඳව බව ඔයා දන්නවා නේ?

දැන් අපි ප්‍රතිඵල ගැන සරල විශ්ලේෂණයක් කරමු...(අපි දේශපාලන විද්‍යා පොරවල් නෙවි. නිකං ඡන්ද දායකයො විතරයි)

සියල්ල බැළුවාම ආණ්ඩුවේ ඡන්ද පදනමේ දෙදරායාමක් ඕන කෙනෙකුට පේනවා නේ(ඇමතිලා හි‍තේ දුකට මොනවා කිව්වත්)ඒ වගේම එ.ජා.පෙත් සතුටු දායක මට්ටමක නෑ නේ(ඒක කොහොමත් උපන්නට වැනෙන එකක් නෙව) මේ සැරේ දිනුමක් ලබපු පිරිස ලෙස සතුටු වෙන්න පුළුවන් කම ඇත්තටම තියන්නෙ ප්‍රජාතන්ත්‍රවාදී පක්ෂයට හා ජනතා විමුක්ති පෙරමුණට පමණයි.

විශේෂයෙන්ම ජ.වි.පෙ. නව නායකත්වය වටා විශාල තරුණ පරපුරක් එක්රැස්වෙන බව දේශපාලන අන්ධයෙකුට වුනත් පේනවා. ඒක ඇත්තටම එක්සත් ජාතික පක්ෂයට ලබා දුන් සංඥාවක් කියලා දැං වත් එහි පුටුව බදාගෙන සිටින ජාති අන්ධයට පෙනුනොත් ලබන සැරේවත් ගොඩ යාමක් තියේවි.(ආහ්! අපිට අමතක වුනා,එයාලට ඇත්තටම ගොඩයන්න ඕන නෑ නෙ.)

රජය තමන් යන ගමන ගැන නැවත නැවත සිතා බැලීම ඔවුන් ගේ අනාගත සුබ සිද්ධියට වැඩදායී වෙයි කියලා අපිට හිතෙනවා.මොකද ජනතාව සීඝ්‍රලෙස විකල්ප සොයනවා! විශේෂයෙන්ම අතිගරු ජනපතිඳුන් ඇතුළු ඇමතිවරු රැසක් නියෝජනය කරන දකුණේ ජනතාව ආණ්ඩුවෙන් ඈත්වෙමින් විකල්ප වෙත යොමුවීම සහ සංවර්ධන ක්‍රියාදාමය කේන්ද්‍රවීම ඔවුන් දකින ආකාර පිලිබිඹු කරනවා විය නොහැකි ද? සංවර්ධනය සහ ජනතාවගේ ජීවන වියදම ඇතුළු සමාජ ආර්ථික පසුබිම පිලිබඳ රජයේ සංවේදීතාව ප්‍රශ්නගත වී ඇත.

කෙසේ වෙතත් එක්සත් ජනතා නිදහස් සංධානය මැතිවරණය අති විශිෂ්ඨ ලෙස ජයගෙන ඇත.අපි ඔවුන්ට සුබ පතමු!

බුද්ධි පරීක්ෂණයේ ප්‍රතිඵල අනුව කළුතර හා ගම්පහ දිස්ත්‍රික්ක වල පිලිතුරු ලියු අයගෙන් බහුතරයකට විශේෂයෙන්ම "ගොටුකොළ කැඳ" කෝප්පය බැගින් උදේට උදේට පානයට නිර්දේශ කල හැක්කේ එය බුද්ධි වර්ධනයට හේතුවන බවට ජන මතයක් පවතින නිසයි.

ඉතින් නිර්වින්දනයට ලක්ව තිබු රජයේ මධ්‍ය ස්නායු පද්ධතියට විද්‍යුත් දාරාවක් යවා වෙව්ලවා හැරීමට සමත්වු මේ මැතිවරණය කාට කාටත් මහත් වැඩදායි එකක් වු බව සහ එම කාර්යයට අපේ ලිපි යම් පමණකට හේතු වූවා නම් එය අපට සතුටකි.

කුමණ පක්ෂයකට හෝ තම කැමැත්ත පළකල ඡන්ද දායක සැමට අපේ සුබ පැතුම්!

(ප්‍රති මත සඳහා ද ඉඩ ඇත)

Saturday, March 22, 2014

බුද්ධි පරීක්ෂණය ලබන සතියේ!!

බස්නාහිර සහ දකුණේ ජීවත්වන ලාංකිකයන්ට රජය විසින් ලබන සතියේ බුද්ධී පරීක්ෂණයක් පැවැත්වීමට නියමිතය.විභාග දෙපාර්තමේන්තුව වෙනුවට මේ සඳහා මැතිවරණ දෙපාර්තමේන්තුව යොදාගැනීමට නියමිතය. මේ වන විට සියළු විභාග අපේක්ෂකයන් සඳහා ප්‍රවේශපත් නිකුත් කර හමාරය.තව ද මේ විභාගය සඳහා යාමේදී ජාතික හැඳුනුම්පත හො වෙනත් අනන්‍යතා පතක් රැගෙන යාම අවශ්‍ය ලු.

විභාගය 29 දා පෙ.ව.7 සිට ප.ව.4 දක්වා විභාග මධ්‍යස්ථාන රැසක දී පැවැත් වේ ලු.

ඉතින් අපි හිතුවා මේ විභාගයට යන ඔයාලා වෙනුවෙන් අනුමාන ප්‍රශ්න පත්‍රයක් ලබා දෙන්න. ඔයාල මේ ප්‍රශ්න වලට පිලිතුරු ලියලා යටි සිතට යොමු කරලා හරි වැරදි බලාගන්න... එක් ප්‍රශන්යකට ලකුණු 10 ගානේ දාගෙන අවම වශයෙන් 40% ක් වත් ගන්න බලන්න. එහෙම උනොත් විභාගෙ ගොඩ! රටත් ගොඩ!

ප්‍රශ්න අංක 01
ඔබ වෙසෙන පළාත් සභාවෙන් ඔබට අවංක ප්‍රතිලාභයක් ලැබුනා ද?(ඔව් නම් ඔවුන්ම පත්කරන්න.පහත ප්‍රශ්න වලට පිලිතුරු දීම අනවශ්‍යයි.)

ප්‍රශ්න අංක 02
ජිනීවා ඔබේ පළාතට අයත් ද?

ප්‍රශ්න අංක 03
LLRC යෝජනා ගෙනාවේ කවුද?

ප්‍රශ්න අංක 04
පිල්ලේ ට "එව බලව" කිව්වේ කවුද?

ප්‍රශ්න අංක 05
පළාත් සභාව සහ විදුලි පුටු අතර සම්බන්ධයක් තිබේ ද?

ප්‍රශ්න අංක 06
අධිවේගී මග පළාත් සභාවට අයත් ද?

ප්‍රශ්න අංක 07
එක් පාර්ශ්වයකට අධි බලයක් ලබාදීම ප්‍රජාතන්ත්‍රවාදයට හිතකර ද?

ප්‍රශ්න අංක 08
මධ්‍යම පාලනයට හානියක් නොකර ඊට සංවේදනයන් ඇති කිරීමට අවශ්‍ය ද?

ප්‍රශ්න අංක 09
වංචා,දූෂණ,මැර බලය ආදී යහපාලනයට හානිකර දේ පිළිබඳ ඔබේ සංවේදිතාව කොපමණ ද?

ප්‍රශ්න අංක 10
සිංහල අවුරුද්දට බඩු ගන්න පසුම්බියේ මුදල් ප්‍රමාණවත් වේ ද?

යටි සිතේ ඇති සැබෑ පිලිතුරු පත්‍රය ඔබට සහය වනු ඇත.කුමණ ලකුණු ප්‍රමාණයක් ලැබුනත් 29 දා විභාගයට යන්න. ඒ ඔබේ එකම අයිතිවාසිකමයි.විශේෂයෙන් අපේ දකුණේ බුද්ධිමත් පිරිසට මේ ප්‍රශ්න පත්‍රය කිරි කජු වගේ ඇති.! පුද්ගල වාදයෙන් මිදී හෙට ගැන සිතමු... දන්න කියන අයටත් මේක දෙන්න.මීට පරස්පර ප්‍රශ්නාවලියක් ඔබ සතු නම් එකතු කරන්න.... අපි එයට ද ගරුකරමු.

අපි කුමක් කීවත් තීරකයා ඔබයි. නිදහසේ සිතන්න.
















Wednesday, March 5, 2014

අපෘෂ්ඨවංශී, ජනහිත කාවී,රට උලා කාපී සම්මානය දෙමුදෝ කාට?

අයි.ටි.එන් නිවුස් නැරඹීමෙන් පසු රෑ දහයට පමණ මා ඇඳට වැටුනේ සුවසේ නිදා ගැනීමේ අරමුණිනුයි.
කෙතරම් සුන්දර රටක අපි ජීවත් වන්නෙමු ද?සියල්ලට ම වඩා රට ගැන සිතන කාසිවාසි දෙස හොරැහිනවත් නොබලන උත්තමයින් නිරතුරු අපි රකිති.ඉතින් අපි කුමට බිය වෙමු ද?

කසඩ විපක්ෂ බලවේග රටට එරෙහි වීමට විටින් විට බලති(ඡන්ද කාලවල) උන් පට්ට පතුරු ගැසිය යතුය. ඒත් ඒ අමනයින් පක්ෂයට ආ කල, අහෝ! නැත.. උන් එසේ එන විට දුෂ්ඨ හැව විපක්ෂයේම දමා එන නිසා මල් තියා වැඳ පිළිගත යුතුය. මහින්ද අ‍(බේ)සුන්දර මහත්තයා මේ සියල්ල මනා ලෙස පැහැදිලි කර දෙන නිසා ගොනාට උනත් තේරෙන්නේය. ඒ පිනෙන්ම ඔහු අවීචිමහා දිව්‍යලෝකයට යනු ඇත.
(ලංකාව=ආශ්චර්යය,අවීචිය=දිව්‍යලෝකය)

එසේ සිතමින් නිදාගත්තෙමි.

බූ...හහ් හා....

Saturday, March 1, 2014

ඔබ මට තරුවකි-41(අවසාන කොටස)


පණිවිඩය ලද සැනින් දේවිකාත් වීරසූරියත් රෝහලට පැමිණියා. මංගලාත් දිසානායකත් රෝහල් කොරිඩෝවේ ඔබ මොබ ඇවිදිමින් සිටිනු ඔවුන් දුටුවා.

“කොහොමද මංගලා දුවට?” දේවිකා අවිනිශ්චිත ස්වරයෙන් විමසුවා.

පිවිසෙන්න... "නව කථාව" පිටුවට

(කමෙන්ට් එකක් දැම්මොත් වඩාත් හොඳයි.)

Saturday, February 22, 2014

ඔබ මට තරුවකි 40 (අවසන් පූර්ව කොටස)

ඉතින් රසවතුනි, මෙතෙක් කලක් ඔබ ආදරෙන් රස විදි මේ නව කතාව ඔබට අවැසි නම් මෙතනින් අවසන් කල හැකිය.... එහෙත් කතාවේ සැබෑ අවසානය මෙය නොවේ... එය විමසා බැලීමට අවැසි නම් මීලඟ කොටස තෙක් මඳක් ඉවසන්න....

"නව කථාව"

Wednesday, February 5, 2014

ඔබ මට තරුවකි 39


“අපේ බූරුවට පිස්සුද? කසාද බැදපු එකියක්ව කැන්දන් එන්න...” අවිශ්කගේ පියාගේ දැඩි විරෝධය එසේ මතුවෙද්දී “අනික මහ අවාසනාවන්ත කෙල්ලක්” යනුවෙන් අවි අමෝරාගන්නට මව සූදානම් වුනා.

නිවෙන්නට ලං වන තරුවේ අවසන් කිරණ රැස....(පිවිසෙන්න,"නවකථාව" පිටුවට)

Tuesday, February 4, 2014

ණයකාරයාගේ නිදහස

ඇමරිකාවෙ මාමා ට
චීනෙ නැන්දා ට
ඉන්දියාවේ අයියා ට

තවත්

හුගදෙනෙකු ට

ණය දෙන්න ඇත මට

ඒත් නිදහස් ලු මං

ඇත්ත ද බං!?

Monday, February 3, 2014

ජීවන මේ ගමන සංසාරේ....

ඔයාලා කවුරුත් සෙවනැලි දැකලා ඇති නේ? ඒත් සෙවනැල්ලෙන් වැඩගන්න හිතලා තියද?
සෙවනැල්ල අස්පෘශ්‍ය වත්කමක් කරගත්තු අති දක්ෂ පිරිසක් කරපු අතිශය සංවේදී රූපාවලියක් දකින්න ඔබට කරන ආරාධනයයි මේ.

අපේ අළුත්ම ලේබලය වන "සංවේදී" යටතේ ඔයා සමග මිනිස්කම,උත්තුංග මානුෂීය වටිනාකම් ගැන සංවාදයක් කරන්න අපි කැමතියි.

මේ රූපරාමු පෙළ අවසන්වනතුරු බලන්න.උපුටා ගත්තෙ "Britain's got Talent" වැඩසටහනින්.හැබැයි මේ දක්ෂ කන්ඩායම බ්‍රිතාන්‍ය පිරිසක් නෙවෙයි.ඒත් ඔවුන්ගෙ දක්ෂකම ජාති බේද නොතකා ඔවුන්ට ඉදිරියට යන්න පාර සැකසුවා.

මේ ATTRACTION ‍සෙවනැලි සලරූ කන්ඩායමයි...

video

Saturday, February 1, 2014

අනේ අනිච්චං! හෙට රට කොයිබට ද?

ඊයේ(31/01/2014) සිරස බැළුව ද? සිරස කිව්වේ ඔලුව බැළුව ද කියන එක නෙවි කියලා ඔලුව තියන අයට කියන්න ඕන නෑ නේ.ඒත් අපේ රටේ හොදම ඔලු ටික ඊයේ "සිරස ලක්ෂපති" වැඩසටහනට කැදවලා තිබුනා.ඉතාම අගේ කලයුතු දෙයක්!

ඒත්....

වැඩසටහන යද්දි අපිට අපේ ඔලු පරීක්ෂා කරගන්න හිතුනා. ඒ මේ රටේ හෙට දවසේ ජීවත් වෙන එකේ තේරුමක් තියේවි ද කියලා.

ඇයි? ඒ.... ඔබට එහෙම විමසන්න සිතුනා නේ ද?

සිරස ලක්ෂපති වැඩසටහනට ඊයේ කැදවා තිබුනේ පසුගිය වර අ.පො.ස. උ/පෙළ ලංකාවෙන්ම 1 සහ 2 වුනු දක්ෂ කොල්ලො කෙල්ලො ටිකක්.විවිධ විෂයපත ඔස්සේ රට දිනු පිරිසක්.

මුලින්ම Hot Seat එකට අවේ ජීව විද්‍යා මල්ලියා. දැනුම හොදයි.. ඒත් ඒ දරුවා චිරප්‍රසිද්ධ "සුළං කුරුල්ලෝ" ගීතය අසාවත් නෑ ලු.කුමන රසඥතාවක් ද මේ!

පසුව පැමිණි  නංගියා තමා ගේ ප්‍රධාන ආහාරය සැකසෙන විධිය වත් නොදනී... වී ඇටය සහල් වන්නේ කුමන තැනක දී ද නොදනී. කුඹුර,කමත..... වංගෙඩිය යනාදි පිළිතුරු අතරින් එකක් තේරීමට නොහැකිව ප්‍රේක්ෂකාගාරයට බාරදෙයි! අඩුම තරමේ සිතන්නට වත් බැරි ද?

මෙවන් අය ද හෙට රට බාර ගන්නේ? ගොවියා දහදුක් විද සකසන වී ටික සහල් වී(දැන් නම් මෝලේ දී) මා පියන් දහ දුක් විද උපයන මුදලින් එය බත් වී තම ඉදිරියට ආවිට මොවුන් ගිලී වී.. එපමණකි.

මේ මොවුන් ගේ වරද නොව අධ්‍යාපන ක්‍රමයේ වරදකි.මෙවන් පිරිස් පාලනය කීරීම පහසු නිසා පාලකයින් ද මේ ක්‍රමය වෙනස් නොකරති.

සංවාදයට ගතයුතු කරුණක් ලෙස ඔයාට දැනුනා නම් අදහසක් පළකරන්න අමතක කරන්න එපා.


Monday, January 27, 2014

චීනා සදට ද කෙලියි!

චීනය විසින් සද වෙත යැවු ජේඩ් රැබිට් නම් වු රෝවරයේ කාර්මික දෝෂයක් හටගෙන ඇති බව විදෙස් පුවත් වාර්තා කරයි. මේ වනවිට එය පිස්සු කෙලිමින් සිටින බවත් නැවත යතා තත්ත්වයට පත් කීරීමට වීනුන් දත කන බවත් වාර්තාවේ.

පෘතුවි තලය පුරාම සිය දහ ජරා නිෂ්පාදන විසුරුවමින් මෙහි අබිලි අංගන සකසන චීනා සද ද වනසා දමන කාලය දැන් උදාවී ඇත.ලංකාවේ ද දැවැන්ත සංවර්ධන ක්‍රියා(පවුලේ නාලිකාවට අනුව) සදහා චීනා ගේ දායකත්වය ලැබීම සහ එම ව්‍යාපෘතිවල උසස් තත්ත්වය පිලිබද හසල අත්දැකීම් ඇති අපි අහිංසක සදට ආවඩා අයුබෝ (පනාපුත්‍ර-ජැක් සන්) කියා පතමු!


Saturday, January 25, 2014

මේ සැරේවත් හරියට ගේම ගහමු ද???

දකුණේ කොල්ලන්ට,කෙල්ලන්ට හිතලමතලා හරි තීරණ ගන්න පුළුවන් කියලා පෙන්වමු...

මොකද කියන්නෙ?

නැත්නං......
                                                                      
වෙන මොනවා කියන්නද? හිත රිදුනනං Sorry හොදෙයි!

Sunday, January 19, 2014

ෆොන්සේකා ෆෝබියා!!!

ශ්‍රී ලංකාවෙන් බිහිවූ විශිෂ්ඨතම සෙන්පතියා ලෙස කලක් මහ ඉහලින් වර්ණනාවන්ට පාත්‍ර වු හා පසුව එම වර්ණනාකරුවන්ට වණයක් වීම නිසාම මළකෑ ඇණයක් ලෙස ඉවතලු සරත් ෆොන්සේකා මහතා, විටින්විට මතුවෙමින් ලාංකීය දේශපාලන කරළිය පෙරළි කරමින් සිටී.පසුගිය පළාත් සභා මැතිවරණයේ දී සිය අභිනව පක්ෂය රටේ තෙවන බලවේගය බවට පත් කිරීමට ඒ පෞර්ෂයට හැකිවීම අරුමයක් ම නොවේ.

දැන් නැවතත් මැතිවරණ දෙකක් ඇරඹි තිබේ.ඊයේ(18/01/2014) ප්‍රවෘත්ති ප්‍රකාශ නැරඹීමේදි පෙනි ගියේ පොලිස් නිළධාරීන් විසින් ‍ෆොන්සේකා මහතාගේ ප්‍රචාරක කටයුතු ස්වේච්ජාවෙන් බාරගෙන ඇති බවකි.
ඉතා කුඩාවට පැවැත්වීමට ගිය රැස්වීමක් ජනමාධ්‍යවල ප්‍රධාන පුවතක් බවට පත්කර ඒ ඔස්සේ ෆොන්සේකා මහතාගේ පක්ෂයට දැඩි ආරක්ෂිත ප්‍රචාරයක් ලබා දීමට පොලීසිය කටයුතු කර තිබිනි.

එතුමා රැස්වීමද පවත්වා ඇත.ප්‍රචාරයද ලැබී ඇත.ස්පීකර් හිරේ ඇත.!

ෆොන්සේකා මහතා සම්බන්ධව මෙරට නීතිය අකුරටම ක්‍රියාත්මක වේ. වෙනත් අයට නීතියේ කුඩා හො හිලකින් රිංගා යාමට අවස්ථා තිබිය හැක.

ඇත්තටම ෆොන්සේකා මහතා සම්බන්ධව ගොඩනැගි ඇති මෙම භීතිකාව(ෆෝබියා) රජයට එතරම් වාසි සහගත නොවන බව හුදී ජනයාගේ අදහසයි.ෆොන්සේකා මහතාට ද තම මුඛය පරිස්සම් කරගත හොත් වඩා සාර්ථක දේශපාලන ගමනක් යාමට හැකි බව ජොතිෂ්‍යකරුවන් නොවුවත් ඇස් කන් ඇති අපිට අනාවැකි පැවසිය හැක.ඒ සම්බන්ධව විශිෂ්ඨ රාජ්‍ය පාලන පරිචයන් පෙන්නුම් කල ආර්.ප්‍රේමදාස මහතා මෙන්ම වත්මන් අතිගරු ජනාධිපති මහින්ද රාජපක්ෂ මැතිතුමන්‍ ගෙන් ආදර්ශයන් ලබාගත යුතුවනු ඇත."ඉවසන දනා රුපු යුධයට ජයකොඩිය" යන කියමන තමාට නිතර පෙනෙන තැනක සවිකර ගන්නේ නම් මැනවි.

"දකුනේ ජනතාව විශිෂ්ඨය" යන්න සමාජ වෙබ් අඩවි ඔස්සේ ද පාරම්බාන කොල්ලන්ට කෙල්ලන්ට දකුණේ අය අඩුම වශයෙන් සවිඥානික බව වත් ඔප්පු කිරීමට මෙවර මැතිවරණයේදි හැකි වේවායි අපි පතමු. එසේ වුව හොත් දේශපාළුවන් අතින් සිදුවු ළමා අපචාර, දූෂණ,ගසාකෑම් නිසි ප්‍රතිචාර ලැබූ සිදුවීම් ලෙස අවසන්වනු ඇත.
එවන් සිදුවීම් අතීත සිද්දි පමනක් වනු ඇත.

මේ ලිපිය නිසා අපි "දිණමිණේ" සතුරන් විය හැක.අපේ අඩවිය කිසිදා පුවත්පතේ බ්ලොග් තීරුවට නොඑනු ඇත.කම් නැත,සැබෑවටම එය අනවශ්‍යය. ඒ පිටු අතර රැදීමේ අපේක්ෂාවක් අත්තටම අපිටනම් නැත.නමුත් ඔවුන්ගේ ප්‍රයාත්නය බ්ලොග්කරුවන්ට උද්දීපනයක් වූවානම් එයට අපිද ස්තුති කරමු.

අවසාන වශයෙන් සැමට සමාන නීතියක් ඇති රටක්(අඩුම ගනනේ "දකුණක්'') බිහිවේවායි අපි ප්‍රාර්ථනා කරමු!

Tuesday, January 14, 2014

ඔබ මට තරුවකි 38



විකුම් ගේ එම පැනය දිනිතිට නොසිතුවිරූ ප්‍රහාරයක් වගේ වුනා. ඇය ඉබේටම නැගිට්ටවුනා.ඇය විකුම්ට පිටුපා ‍ඉස්තෝප්පු කනුවකට බර දුන්නා.

“ඇයි ‍ඔයා කතා නැත්තේ?” තමාගේ පැනය මෙවන් මොහොතක ඇසීම කෙතරම් නුසුදුසු ද? ඇගේ සිත කෙතරම් රිදෙන්නට ඇති ද? වැනි ප්‍රශ්න විකුම් ගේ සිත පුරා නැගෙද්දී ඔහු විමසා සිටියා.

රස විදින්න, නව කථාව පිටුවට පිවිසෙන්න...