ආයු‍බෝවන්!!!

කිරියෙන් පැණියෙන් ඉතිරෙන දිනයක් ‍‍වේවා!! ආරම්භය:2012/01/08

Sunday, May 3, 2015

පින්බර වෙසක් දිනයක් වේවා!!!

අනන්තජින වූ තුන්ලෝකාග්‍ර වූ ශාන්තිනායක වූ අමාමෑණී වූ ලොකනාථ වූ ශාක්‍යසිංහ වූ අංගීරස ගෞතම ශ්‍රී සම්මා සම්බුදු රජාණන් වහන්සේගේ උතුම් තෙමගුල සිහි‍කෙරෙන වෙසක් පුර පසලොස්වක් පොහොය දිනය අදයි.

සිදුහත් උපත,සම්බුද්ධත්වයට පත්වීම,මහා පරිණිර්වාණය යන කාරණා සිහිකෙරෙන අද දින අප බුදුන්වහන්සේ ගිහි අපට දේශනා කල අවම සීලයවත් රැක(පන්සිල්) ඒ තුලින් ප්‍රතිපත්තිගරුක වී අන්‍යාගමිකයන්ට ද ආදර්ශයක් ලබා දී බුදු දහමේ වටිනාකම් මතුකරන්නට ඔබ සැමට සිත් පහල වේවායි අපි පතමු...!

Wednesday, April 8, 2015

බුද්ධ පුත්‍රයෙකු ගේ භවයක නිමාව!

අස්ගිරි පාර්ෂවයේ මහනායක අතිපූජ්‍ය උඩුගම ශ්‍රී බුද්ධ රක්ඛිත ස්වාමින්වහන්සේ අද(2015/04/08) අළුයම සිංගප්පූරුවේ රෝහලක දී අපවත්වූ බව සංවේගයෙන් යුතුව මෙසේ සටහන් කොට තබමු.

බුදු සසුනේ චිර පැවැත්ම වෙනුවෙන් මහත් සේවයක් කල උන්වහන්සේ ගේ ආදාහන පූජෝත්සවය 12 වන දින සිදුකෙරෙන බවත් එදින ජාතික ශෝඛ දිනයක් ලෙස ප්‍රකාශයට පත්කර අති බවත් දැනගන්නට තිබේ.

අපි බුද්ධ රක්ඛිත හිමියන්ට නිවන් සුව ප්‍රාර්ථනා කරමු!!!

(නාහිමියන්ට කරන ගෞරවයක් ලෙසින් අපගේ පිටුවෙහි පසුතල වර්ණය ලෙස 12/04/2015 තෙක් පඬු පැහැය යොදන බව කරුණාවෙන් සලකන්න.)


Friday, April 3, 2015

නරි නෑවීම

සිදුවූයේ කුමක් ද? සිදුවන්නට යන්නේ කුමක් ද? අපි ඒ ගැන සිතිය යුතු ද? ලියන්නට බොහෝ දේ ඇත... ලියා වැඩක් තිබේ ද? මේ රට මේ ඔලමොට්ටල දේශපාලකයන් සමඟ ගොඩනැගිය හැකි ද? කිසි දා නොහැකිය.

සියල්ලෝම එකය....

පසුගිය ජනවාරියේ අපි සිදුකලේ "මැක්කන් මැරීමට බල්ලාට වෙඩි තැබීම" යැයි අන්තර්ජාල සටහනක් දුටුවෙමු. ඒත් බල්ලා තවමත් මැක්කන් සොයාගොස් ඇඟේ දමාගනිමින් සිටිනු පෙනේ.... බල්ලා ද හැදෙන පාටක් නැත.

මැක්කෝ ද බල්ලන් නැත්නම් නරින්ගේ ඇඟේ හෝ එල්ලී දිවි ගැටගසා ගනිති.අපි හැමදාම එක්කෝ බල්ලෝ නාවති නැති නම් නරි නාවති. එක අතිකට බල්ලා නෑවීම වරදක් නොවේ යයි කෙනෙකුට කිව හැක.ඒ ඌ බොරුවට හෝ සොරු දුටුකල බුරන නිසාය.

ඒත් නරි නෑවීමේ පලක් තිබේ ද?

අපි ඌ නාවා අත පිස දා හැරෙන විටත් උෟ බැද්දේ පෙරළෙමින් දහ ජරාවක් කමින් සිටිනු දැකිය හැකි වන නිසා ය.

ලගදී දිනක අපිට නැවතත් වතුර,සබන්,ෂැම්පු ද ලබා දෙනු ඇත. අපි සරම් කැසපට ගන්වා පෙලට එන නරි ද බල්ලෝ ද නහවමු! ඉන්පසු කුකුල් කොටුව බලා ගැනීමට උන්ට බාර දෙමු... එවිට බල්ලන්ට හොරා නරි ද (මෙවන් වැරදි නිසගයෙන්ම නරින් පිට පැටවිය හැකි නිසා) නරින්ට හොරා බල්ලන් ද කුකුල් කොටුව බුක්ති විඳින හැටි අපිට අර සබන් ම කකා බලා සිටිය හැක.

නැවත ද බල්ලන් හා නරින් තර වු කල මැක්කන් ද ඉබේ ම බෝවී දෙපාර්ෂවයේම සාරය උරමින් යෙහෙන් කල් ගෙවනු ඇත.

ඉන් පසු බල්ලන් හා නරින් සමාන යයි ද අපි වෙනස්ම සුන්දර සතුන් කොටසක් යැයි ද පවසමින් වෘකයින් අපි හමුවට එනු ඇත. අපි උන් විමසා බලා දැනට මැක්කන් වැඩිය වසා නැති හෙයින් ඉතුරු කුකුලන් බලා ගැනීමට උන්ට පවරනු ඇත.

සෑහෙන කලක් සුදාගින්දරේ පසුවු වෘක රැළ කුමක් කරනු ඇති ද?

Sunday, February 1, 2015

දූෂිත දේශපාලකයින් ගෙන් තොර නිදහස් ශ්‍රී ලංකාවක්...

බලව් පොලොන්නරු අනුරාපුර     පෙදෙස
සිතව් පැවති නිදහස මෙහි පෙර      දවස
නගව් තව තවත් තිරසර තරුණ     ගොස
වරෙව් යමව් නැගිටිව් නොපියව්    දෙ ඇස

"නිදහස් මන්ත්‍රය- ටිබෙට් ජාතික එස්.මහින්ද හිමි."

Sunday, January 25, 2015

ඇයි අපි ඔටුවො ද?

ලබන 29වන දා(29/01/2015) ගෙන එනු ලබනවා යයි කියන අතුරු අයවැයෙන් රජයේ සේවකයන් සඳහා රු5000ක පමණ වැටුප් වැඩිකිරීමක් සිදුවන බව අසන්නට ලැබේ. එය විශිෂ්ඨ ක්‍රියාවකි. අපි එය අගයමු.

ඒ අනුව 1200000කට ආසන්න රජයේ සේවකයන් 29 දාට පසු සිට රු 5000ක හයියක් ඇතුව කඩපිලට යනු ඇත.
 නව ජනපති හා නව රජය ඔය සිටිනා තැන තැබුවේ රාජ්‍ය සේවකයන් පමණ ද? 5000000කට අධික පෞද්ගලික සේවකයන් ඡන්දය දුන්නේ නැති ද? ඔවුන්ට කන්න බොන්න බඩුමුට්ටු ගැනීමට වෙනම තැනක් තිබේ ද? ඔවුන් ද ඒවා ගතයුත්තේ අනිකුත් අය ගන්නා මිලට,එම වෙළඳසැල් වලින්මය.

ඉතා අඩු වැටුප් යටතේ සිය රුධිරය දහදියට හරවමින් විටෙක රජයේ සේවකයාටත් වඩා සිය උපන් බිම වෙනුවෙන් සේවය කරනා පිරිසකි පෞද්ගලික අංශ සේවකයා. ජනපතිතුමනි,ඔවුන් ද ඔබේ රටවැසියන්ය.!

"රජයට පෞද්ගලික අංශයේ වැටුප් නියාමනයට බලපෑම් කල නොහැකිය-ඉල්ලීම් පමණක් කල හැකිය" මෙය පෙර රජයත් වත්මන් මුදල් ඇමතිත් කෙඳිරූ හා කොඳුරන අපබ්‍රංශයයි.


රටක්තුල පවතින එක්තරා ව්‍යුහයකට බලපෑම් කරන්නට ඒ රට කරවන්නට ඒ රට වැසියා බලයදුන් පිරිසටවත් නොහැකි නම් සැබෑ බලවතුන් කවුද?

මුදල් ඇමති ව්‍යාපාරිකයෙක් විය හැකිය.. ඒත් එය වෙනම කරුණකි.

අපි සියළු පෞද්ගලික අංශ සේවකයින්ට එක සමානව වැටුප් වැඩිකිරීමට නියෝග කරන්න යයි ඔබට නොකියමු.එය සුළු පරිමාණ ව්‍යාපාරවලට කල නොහැක. අපි කියන්නේ විශේෂයෙන් 2007 අංක 07 දරණ සමාගම් පනත යටතේ ලියාපදිංචිකර ඇති ආයතන පිලිබඳ අවදානය යෙමු කරන ලෙසයි.

එහි දී ද ආයතනයේ සත්‍ය පිරිවැටුම(Turnover) මත(එය අධීක්ෂණය කිරීමට මීට වඩා බලවත් නීති හා රෙගුලාසි අවැසිය)
එහි සේවක වැටුප් සේවක ශ්‍රේණි අනුව ප්‍රතිශතාත්මකව වැඩිකල යුතු ක්‍රමවේදයක් සකසන ලෙසයි.(ඉන්ධන මිල සූත්‍රය/විදුලි සූත්‍රය වැනි)එසේම පිරිවැටුම මත අවම මූලික වැටුපද තීරණය කල යුතුය.(පිරිවැටුම වාර්ෂිකව වෙනස් වේ නම් ඒ සඳහා ද පරාසයක් නියමකල හැක.)

නීති නැති නම් නීති සෑදිය යුත්තේ ඔබලාම නොවේ ද? ඒ සඳහා පරම බලය,ජනතාව ඔබට පැවරූවේ බකංනිලා සිටීමට නම් නොවේ.අපි අපේ අන්තර්ජාල වියදම් පුද්ගලිකව දරමින් දිවා රැ ස්වයං ප්‍රචාරක යාන්ත්‍රන දියත්කලේ "කසන" නිසා නොව වෙනසක් අවැසි නිසාය.

දැනට වඩා රජයේ විගණන අංශ මේ ආයතනවල වත්කම් නියාමනය කලයුතුය.

රටේ ධනය සොරාකෑ පාලකයන් සොයායන ඔබ රජය, පුද්ගලික අංශයේ සේවකයාගේ සාරය උරාගනිමින් ධන උල්පත්වල කිමිදෙන කුවේරයන් පිලිබඳ සොයන්නේ කවදා ද?

එය නම් ශ්‍රී ලාංකික අපිට දවල් හීනයක් ම වනු ඇත.
www.kiripeni.blogspot.com- MW Team

Saturday, January 10, 2015

වෙනස කලෙමු

ජනාධිපතිවරණය අවසන්,නිල ප්‍රතිඵල අනුව මෛත්‍රීපාල සිරිසේන මහතා ජයගෙන තිබේ.අපේ මත විමසුමද එ් අනුව නිවැරදිය.
ඒ ගැන කතා කර වැඩක් නැත. දැන නව ජනපති දිවුරුම් දී අවසන්ය.ඔහු නව අගමැති ලෙස රනිල් වික්‍රමසිංහ මහතා පත්කර තිබේ. දෙදෙනාටම සුබ පතමු.!



දැන් තමයි වැඩේ...

දින 100ක ප්‍රතිපත්ති ප්‍රකාශයක්,වැඩ පිලිවෙලක් ඔබ දෙපල ඉදිරියේ ඇත.ඔබට ඡන්දය දුන් ජනතාව එහි ඉස්පිල්ලක් පාපිල්ලක් දක්වා ඉටුකරනු ඇතැයි බලාපොරොත්තුවෙන් සිටී.ඉන් ස්වල්පයක් හෝ අපගමනය වනවාට ඔවුන් අකමැතිය. අපි ද අකමැතිය...

මන්දයත්?

අපි මතවාදී ලෙස ඔබට හිතවත් වූ ප්‍රචාරන ව්‍යාපාරයක නියැලී සිටි බව මේ කියවන පිරිස හොඳින් දන්නා නිසාය.අපි ඔබේ මතවාදය සුදුසුයයි විශ්වාස කරමු.

නමුත් හිටපු ජනපතිතුමන් ගේ අතිශය අගයකලයුතු ගුණාංග තිබූ බව අපි අදටත් කියමු... යුද්ධය දිනාදුන් සේනාධිනායකයා පරජය වූයේ නැත.සුළු පසු බෑමක් සිදුවුවා පමණි. මෙි රටේ මිනිසුන් ගුණමකු නැත.ඒත් ජනතාව ට වත්මනේ අවශ්‍ය දේ වටහා නොගත් බැවින් එතුමාව ටිකකට විඩානිවීමට තැබුවා වැනිය.

නව ජනපතිතුමනි,

ඔබතුමන් බලයෙන් හිස උදුම්මා නොගනු ඇතැයි ද, තම වගකීම්,ජනතා බලාපොරොත්තු ඉටුකරනු ඇතැයි ද අපි විශ්වාස කරමු.

නැතහොත් රටට මෙපමණ සේවයක් කල මහින්ද මහත්තයාට සිදුවූ දේ දසගුණයකින් ප්‍රවර්ධනය වී ඔබ ඉදිරියට එන බව ඉතා ගෞරවයෙන් සිහිපත් කර තබමු.

"ඔබ රටේ හිමිකරු නොව තවෙකාලික බාරකාරයා පමණි" නිතර සිහිකරන්න.

ඔබට දීර්ඝායු වේවා!!!

Saturday, January 3, 2015

මහින්ද නැති කලෙක අපි?



ජනපතිවරණයට තව ඇත්තේ දින කිහිපයකි.මහින්ද රාජපක්ෂ මහතාත් මෛත්‍රීපාල සිරිසේන මහතාත් මේවනවිට කරට කර සටනක නිමග්නවී සිටී. මේ අතර දෙපසටම අතිශයින්ම අප්‍රසන්න අවලං පැනිලි රැසක් ද සිදුවී හා සිදුවෙමින් තිබේ. 

මහජනතාව ප්‍රධාන සාධකය විය යුතු තැනක ඔහු විපරීතවු මනසකින් යුතුව අන්දුන් කුන්දුන් ව බලාසිටී.
මහින්ද රාජපක්ෂ මහතාට සහය පලකරන පිරිස් පවසන්නේ මෛත්‍රීපාල සිරිසේන මහතා වටා සිටින පිරිස් විශ්වාස කල නොහැකි බවත් රටබෙදීමට කටයුතු කරන පිරිසක් බවත් ය. විශේෂයෙන් මුස්ලිම් ජන නියෝජිතයන් හා දමිල ජන නියෝජිතයන් මෛත්‍රීපාල සිරිසේන මහතාට සහාය පලකරනුයේ සිය ස්වයංපාලන අයිතිය දිනාගැනීමට බවයි.

ඒත්...

මේ ඉහත කී පිරිස මහින්ද රාජපක්ෂ මහතාට සහාය පලකල සමයේදී සහ තවදුරටත් සහාය පලකලේ නම් හෝ ඔවුන් තවදුරටත් බෙදුම්වාදීන් නොවිය හැකිය. ඒ අනුව මෙවර නොව කවර වරෙක හෝ මහින්ද රාජපක්ෂ මහතා නමැති පොදු සාධකය නොමැති නම් මුස්ලිම් ජන නියෝජිතයන් හා දමිල ජන නියෝජිතයන් සිංහල ජන නියෝජිතයන් හා එක්ව කටයුතු කල නොහැකි නොවේ ද? සහජීවනයක් කවදා ඇති වෙයි ද?කිසි කලෙක මහින්ද රාජපක්ෂ මහතා නොමැතිව ශ්‍රී ලංකාව නම් රාජ්‍යට පැවැත්මක් නැතිවනු ඇත.

ගැටළුව....

කිසිවකු සදාකාලික නොවීමයි. සියළු සංස්කාරයෝ නැසෙන සුළුය.

ලාංකික ජනයා දේශපාලනිකව අවස්තිථියට ලක්ව තිබේ. එනම් දැන් මේ චලනය වන දේශපාලන රටාව වෙනස් කිරීමට හෝ නිශ්චල වීමට අකමැති වීම හා එයට කැමති වුවත් ඇති කර ඇති බිය නිසා එයට යොමු නොවීමයි.

කවදා කවුරුන් මෙය වෙනස් කරයි ද? එය කලයුත්තේ පිටස්තර බලයකින් නොවන බව තේරුම්ගන්නේ කවදාද?

මෛත්‍රීපාල සිරිසේන මහතා ඒ වෙනස කිරීමට පැමිනි ඉටු දෙවියා යයි අපි නොසිතමු,නොකියමු. වරෙක කියන දේ ඊලඟ මොහොතේ වෙනස් කරන සුළු චරිත ස්වභාවයක් ඇති ඔහු පුද්ගලිකව විශ්වාස තැබිය හැකි අයෙකු නොවේ.

නමුත්...

ඔහු යම්ලෙසකින් අත්තනෝමතික ලෙස කටයුතු කරගෙන යනු ලැබුවහොත් ඔහු වටා සිටින විවිධ බලවේග විසින් යම්තරමිකින් ඔහු බැඳතබනු ඇතැයි දැනට වඩා විශ්වාස කල හැකිය.

අපි දැන් අඳුරු වනාන්තරයක මායිමට පැමිණ තිබේ පසුපසින් ඇත්තේ නිරුදක කතරකි. කතර පිලිබඳ අපි දනිමු. වනාන්තරය අඳුරය,නමුත් එහි ජලය හා අහර තිබිය හැක.වගවලසුන්,මරුවැල්,අමනුෂ්‍යන් ද සිටිය හැකිය. කලයුත්තේ ඉදිරියට පියවරක් තබා බැලීම ද? ආපසු හැරීම ද?


තීරණය ඔබ සතුය...