ආයු‍බෝවන්!!!

කිරියෙන් පැණියෙන් ඉතිරෙන දිනයක් ‍‍වේවා!! ආරම්භය:2012/01/08

Sunday, January 8, 2017

බුදු දහම-උද්ඝෝෂණ-හම්බයෝ-අපේ හාමුදුරුවනේ !!!


සිංහල සංස්කෘතිය සහ බුදු දහම ගසට පොත්ත මෙන් අනවරතව,අවිච්චින්නව බැදී අැති උත්කෘෂ්ඨ සංයෝගයකි.ඒදා වාරියපොළ සුමංගල,හික්කඩුවේ සුමංගල අාදී යතිවර පරපුර විසින් අභීතව නැගූ කාහල නාදය ඔස්සේ නැගී සිටි ජනයා බුදු දහමට හා සිංහල සංස්කෘතියට අගතියක් වෙද්දී නැගී සිටියෝය. ඔවුන් නොමැති නම් අද අපට බුදු දහමක් නැත. අද යතිවර පරපුර ද මතු පරපුර වෙනුවෙන් සිය සමාජ වගකීම ඉටුකරමින් සිටී.

ඒහෙත්....

අද සිදුවන්නේ ඒදා සිදුකළ සද් ක්‍රියාවම ද?

පාරවල් පාරවල් ගනනේ පරම ගම්බිර පරිත්‍රාණ ධර්මය දෙසමින්,පන්සිල් දෙමින්,නැවත වෙෙරී අදහස් පතුරවමින්,ගල් මුල් විසිකරමින් රටේ නීතියට පිටුපාමින් මේ යන ගමන කුමක් ද?

අන්‍යාගමිකයන් මේ දෙස කෙස් බලනු අැති ද? සිනාසිය හැකි හැම පැත්තකින්ම සිනාසෙනු අැත.විදේශිකයන් බෞද්ධ භික්ෂුව දෙසත් බුදු දහම පිලිබදවත් කුමක් සිතනු අැති ද?

අැතැම් නායකයින් "අපේ හාමුදුරුවෙන්" කියමින් ඔබවහන්සේලා උසිගන්වද්දී දිවයන්නට තරම් ඔබවහන්සේලා පහතට වැටුනේ අැයි? වත්මන් පාලකයින් ද සිංහල ජාතියටත් බුදු දහමටත් කිසිම තැකීමක්වත් නැතිව බූරු රැළක් සේ හැසිරෙන බව සත්‍යකි.

නමුත්....

ඔබවහන්සේලා මෙසේ පාරවල් ගානේ ඒක ඒකාගේ ඉත්තන් ලෙස ගුටිකමින්,නොසරුප් බස් අසමින් වැඩම කිරීම සැබෑ බෞද්ධයාගේ සිත කීරි ගස්වයි.ඔබ බුද්ධ පුත්‍රයන් වහන්සේ ය.බුද්ධ වංශිකයන්ය.... අර්හත් ධජය දරණ්නන්ය,අවිහින්සා වාදියෝය.ලොව ජීවමාන පූජනීයම උතුමණ් කල යුත්තේ ගිහි අපට නිසි මග පෙන්වීම පමණි. ක්‍රියාවට නැංවීම හෝ නොකිරීම ගිහියාට අයිති කාර්යයකි.

පන්සලේ වැඩ වෙසෙමින් ඔබ වහන්සේලාට මේ යුගමෙහෙවර කළ හැකිය... මුලින්ම ඔබ සිල්වතකු බව දායකයාට ක්‍රියාවෙන් පෙන්වන්න, පසුව ඔබේ දායකයා(පාක්ෂිකයා) පංචශීලයේ පිහිටුවන්නට උත්සාහ කරන්න.ඒය නොහැකි නම් අන් කිසිවක් කලත් පළක් නොවේ.(උපදෙසක් නොව,ඉල්ලීමකි).

අපිට මොන පක්ෂයක්වත් වැඩක් නැත. අපි බුද්ධ පාක්ෂිකයෝ වෙමු.කණගාටුව උච්චම ස්ථානයටම පැමිණි හෙයින් මෙසේ සටහන් තැබූවෙමු. අපි නිවැරදි යයි මොහොතකට හෝ දැනුනේ නම් තවදුරටත් සිතන්න. නැතිනම් නොසලකාහරින්න... මේ සටහන සම්බන්ධයෙන් පක්ෂ මානයෙන් ඉදිමුනු පාක්ෂිකයන් සමග සංවාද කිරීමට අපි කිසිසේත් සූදානම් නැත.

සියලු සංස්කාර ධර්ම අනිත්‍ය බව දේශිත ශ්‍රී සද්ධර්මය සිය ප්‍රවර්ධකයන් මධ්‍යයේම ඒය සැබෑ කරමින් සිටී....


Saturday, November 5, 2016

සුභාවිත ගීතයේ අමරණීය සළකුණ- පණ්ඩිත් අමරදේව




කර්ණරසායන මධුර මනෝහර හඩින් රසික හදවත් සුකම්පිත කල, මහා ගාන්ධර්වයාණෝ අද දැයෙන් සමුගනිති.යුග යුග ජන සිත් වශීකෘත කල මේ මහා මිනිසා වෙනුවෙන් කම්පා නොවන සිහල හදවතක් ඇත්නම් එය ස්පන්ධනය නොවන මට්ටමක පවතින එකක් යයි අපට උපකල්පනය කල හැක. ඒ තරම් මේ හඩ අප ජන සන්තානයේ පත්ලේ තැන්පත්ව තිබේ.

අප ගුණවැයුම් කොපමන කලත් දැන් පලක් නැත....

දැන් අපි එතුමන්ට පිං දිය යුතුය!

බින්දු බින්දු රන් පද වැල් කොළොම් තොටට සීමා නොකර හන්තානේ කදුමුදුන් හරහා රැගෙන ගොස් තණ්හා ආශා ඔලගු කරේලා සංසාර ගමන යන මිනිසුන්ට විඩා නිවන ඔසුවක් කර පෙවු පින ඔබේ නිවන් මගට පාරමිතා බලයක් ම වේවා...!!!

Sunday, May 3, 2015

පින්බර වෙසක් දිනයක් වේවා!!!

අනන්තජින වූ තුන්ලෝකාග්‍ර වූ ශාන්තිනායක වූ අමාමෑණී වූ ලොකනාථ වූ ශාක්‍යසිංහ වූ අංගීරස ගෞතම ශ්‍රී සම්මා සම්බුදු රජාණන් වහන්සේගේ උතුම් තෙමගුල සිහි‍කෙරෙන වෙසක් පුර පසලොස්වක් පොහොය දිනය අදයි.

සිදුහත් උපත,සම්බුද්ධත්වයට පත්වීම,මහා පරිණිර්වාණය යන කාරණා සිහිකෙරෙන අද දින අප බුදුන්වහන්සේ ගිහි අපට දේශනා කල අවම සීලයවත් රැක(පන්සිල්) ඒ තුලින් ප්‍රතිපත්තිගරුක වී අන්‍යාගමිකයන්ට ද ආදර්ශයක් ලබා දී බුදු දහමේ වටිනාකම් මතුකරන්නට ඔබ සැමට සිත් පහල වේවායි අපි පතමු...!

Wednesday, April 8, 2015

බුද්ධ පුත්‍රයෙකු ගේ භවයක නිමාව!

අස්ගිරි පාර්ෂවයේ මහනායක අතිපූජ්‍ය උඩුගම ශ්‍රී බුද්ධ රක්ඛිත ස්වාමින්වහන්සේ අද(2015/04/08) අළුයම සිංගප්පූරුවේ රෝහලක දී අපවත්වූ බව සංවේගයෙන් යුතුව මෙසේ සටහන් කොට තබමු.

බුදු සසුනේ චිර පැවැත්ම වෙනුවෙන් මහත් සේවයක් කල උන්වහන්සේ ගේ ආදාහන පූජෝත්සවය 12 වන දින සිදුකෙරෙන බවත් එදින ජාතික ශෝඛ දිනයක් ලෙස ප්‍රකාශයට පත්කර අති බවත් දැනගන්නට තිබේ.

අපි බුද්ධ රක්ඛිත හිමියන්ට නිවන් සුව ප්‍රාර්ථනා කරමු!!!

(නාහිමියන්ට කරන ගෞරවයක් ලෙසින් අපගේ පිටුවෙහි පසුතල වර්ණය ලෙස 12/04/2015 තෙක් පඬු පැහැය යොදන බව කරුණාවෙන් සලකන්න.)